Ўзбекистон Республикаси Савдо-саноат палатаси ва Конрад Aденауер номидаги жамғарманинг минтақавий ваколатхонаси ўртасида ўзаро Англашув меморандумини имзолаш маросими бўлиб ўтди

2022 йилнинг 10 феврал куни Ўзбекистон Республикаси Савдо-саноат палатаси (Палата) ва Конрад Aденауер номидаги жамғарманинг минтақавий ваколатхонаси ўртасида ўзаро Англашув меморандумини имзолаш маросими бўлиб ўтди.

Маълумот учун: Конрад Aденауер номидаги жамғарма Германияда биринчи Федерал канслер Конрад Aденауер шарафига ташкил этилган сиёсий жамғарма бўлиб ҳисобланади. Унинг номи Германиядаги демократик ўзгаришлар, трансатлантик қадриятлар ҳамжамиятида ташқи сиёсатнинг мустаҳкамланиши, Европа бирлигининг қарашлари ва ижтимоий бозор иқтисодиётига йўналтирилганлиги билан боғлиқ.

Дунё бўйлаб 120 дан ортиқ мамлакатларда 70 дан зиёд ваколатхоналар ва лойиҳалар демократик жамиятни ривожлантириш, қонун устуворлиги ва ижтимоий бозор иқтисодиётини ривожлантиришга ҳисса қўшиб келмоқда. Тинчлик ва эркинликни таъминлаш мақсадида Жамғарма хавфсизликни таъминлаш, шунингдек, турли маданиятлар ўртасидаги ўзаро алмашинувни таъминлашга қаратилган доимий ташқи сиёсат мулоқотини олиб боради.

Фонд давлат органлари, сиёсий партиялар ва фуқаролик жамияти ташкилотлари билан ҳамкорликда фаолият юритади. Жамғарма минтақавий ва глобал сиёсий ҳамкорликни ривожлантириш соҳасида фаолликка интилмоқда.

Имзоланган ҳужжат доирасида томонлар тадбиркорлик ташаббусларини амалга ошириш учун қулай ҳуқуқий, иқтисодий ва ижтимоий шароитларни таъминлаш, шунингдек, ишбилармон доиралар ва Ўзбекистон Республикаси давлат органлари ўртасида ўзаро манфаатли шерикликни ривожлантириш бўйича тадбирларни ҳамкорликда амалга оширишни йўлга қўйишга келишиб олдилар.

Шу билан бир қаторда, Палата ва Конрад Aденауер номидаги жамғарма ўртасидаги ўзаро ҳамкорлик доирасида Палата ва маҳаллий бизнес учун устувор бўлган масалалар бўйича лойиҳалар ишлаб чиқиш ва амалга ошириш ҳамда қатор тадбирлар (конфереция, давра суҳбатлари, семинарлар ва ҳ.к.), жумладан, “Ўзбекистон бизнесининг коррупцияга қарши курашиш Хартияси”ни илгари суриш, Ўзбекистон ҳудудларида ҳакамлик судлари фаолиятини такомиллаштириш, халқаро арбитражни ривожлантириш, тадбиркорликни қўллаб-қувватлаш соҳасида Германия тажрибасини ўрганиш ва бошқа шу каби тадбирларни биргаликда амалга  кўзда тутилмоқда.

ССП Ахборот-хизмати