Ўзбекистон Савдо-саноат палатаси ва Хитой халқаро савдо палатаси ўртасида ташқи савдо ва инвестицияларни рағбатлантириш ҳамда ҳамкорликда бизнес ҳамжамиятига кўрсатиладиган юридик хизматларни йўлга қўйиш юзасидан онлайн учрашув бўлиб ўтди

Жорий йилнинг 22 февраль куни Ўзбекистоннинг Хитой Халқ Республикасидаги элчихонасининг ташаббуси билан Ўзбекистон Савдо-саноат палатаси ва Хитой халқаро савдо палатаси ўртасида икки давлат тадбиркорларининг ҳуқуқларини ҳимоя қилиш ва ўзаро ҳамкорликни йўлга қўйиш бўйича онлайн учрашув бўлиб ўтди.    

Учрашувда иккала ташкилот вакиллари сўзга чиқиб, ҳамкорликнинг асосий йўналишларини муҳокама қилишди. Хусусан, алоқа ва ҳамкорликнинг турли шаклларини ташкил этиш учун тегишли халқаро ташкилотлар, савдо ва инвестиция агентликлари, тижорат уюшмалари ва ишбилармон доиралар билан кенг алоқаларни ўрнатиш, экспорт-импорт шартномалари бўйича дебитор қарздорликни ундиришда ўзаро ёрдам кўрсатиш, икки давлат тадбиркорларига юридик маслаҳатлар бериш, шунингдек тадбиркорлар ўртасидаги низоларни медиация йўли билан судгача ҳал этиш тизимини йўлга қўйиш масалалари кўриб чиқилди.     

Учрашув якунида Ўзбекистон Савдо-саноат палатаси ва Хитой халқаро савдо палатаси ўртасида юридик масалалар бўйича ўзаро ҳамкорлик битими лойиҳасини тайёрлаш ҳамда юридик хизмат кўрсатиш учун ташкилий ишларни йўлга йўйишга келишиб олинди.