Ўзбекистон Савдо-саноат палатаси томонидан яна бир тадбиркорнинг ҳуқуқ ва қонуний манфаатлари ҳимоя қилинди

Ўзбекистон Савдо-саноат палатасига унинг аъзоси “Chirchik Chemical trade” МЧЖ мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

“Chirchik Chemical trade” МЧЖнинг мурожати ўрганиб чиқилганда, Тошкент вилояти Давлат солиқ бошқармаси томонидан “Chirchik Chemical trade” МЧЖ фаолиятида 2016-2020 йиллардаги фаолияти юзасидан солиқ аудити ўтказилган ва натижаси бўйича далолатнома тузилган.

Сўнгра, Тошкент вилояти Давлат солиқ бошқармаси томонидан “Солиққа оид ҳуқуқбузарликлар материалларини кўриб чиқиш тўғрисида”ги қарори билан “Chirchik Chemical trade” МЧЖга нисбатан молиявий жарима қўлланилиши ҳисобланган.

Тошкент вилояти Давлат солиқ бошқармасининг қароридан норози бўлиб, “Chirchik Chemical trade” МЧЖ Давлат солиқ қўмитасига ариза биан мурожаат қилган ва ижобий натижа бўлмаганлиги сабабли, судга ариза киритиш бўйича Палатага мурожаат қилган.

Мазкур масала юзасидан Палата томонидан ўз аъзоси “Chirchik Chemical trade” МЧЖ манфаатида Давлат солиқ қўмитаси ва Тошкент вилоят Давлат солиқ бошқармасига нисбатан улар томонидан қабул қилинган қарорларни ҳақиқий эмас деб топиш тўғрисида судга ариза киритилган.

Тошкент туманлараро маъмурий судининг ҳал қилув қарори билан Палата томонидан киритилган ариза талаблари қаноатлантирилиб, Давлат солиқ қўмитаси ва Тошкент шаҳар Давлат солиқ бошқармасининг қарорлари қисман ҳақиқий эмас деб топилган ва шу орқали Палата аъзосининг ҳуқуқ ва қонуний манфаатлари ҳимоя қилинган.

ССП Ахборот-хизмати