Ўзбекистон Савдо-саноат палатаси томонидан яна бир тадбиркорнинг ҳуқуқ ва қонуний манфаатлари ҳимоя қилинди

Ўзбекистон Савдо-саноат палатасига унинг аъзоси АТБ “Қишлоқ қурилиш банк” мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

Палата аъзосининг мурожжати ўрганиб чиқилганда, Сирдарё вилояти Боёвут туман ҳокимлигининг фойдаланилмаётган объектларни аниқлаш бўйича ишчи гуруҳнинг хулосаси билан банк балансида бўлган кўчмас-мулк объекти фойдаланилмаётган бўш объект сифатида деб топилиб, банкга нисбатан таъсирчан солиқ механизми қўлланилган.

Мазкур масала юзасидан Палата томонидан ўз аъзоси манфаатида Сирдарё вилояти Боёвут туман ҳокимлиги қошидаги фойдаланилмаётган объектларни аниқлаш бўйича ишчи гуруҳнинг хулоса қабул қилишда ифодаланган хатти-ҳаракатларини қонунга хилоф деб топиш ва ишчи гуруҳнинг хулосасини ҳақиқий эмас деб топиш ҳақида судга шикоят аризаси киритилган.

Биринчи ва апелляция инстанция судларининг қарорлари билан Палата томонидан киритилган шикоят аризаси асоссиз равишда қаноатлантириш рад этилган.

Биринчи ва апелляция инстанция судлари қарорларини бекор қилиш ва Палатанинг даъво талабларини қаноатлантириш тўғрисида Палата томонидан Олий судга кассация шикояти киритилди.

Олий суднинг Маъмурий ишлар бўйича судлов ҳайъатининг тегишли қарори билан биринчи ва апелляция инстанция судлари қарорлари бекор қилиниб, Палатанинг кассация шикояти қаноатлантирилган ва Боёвут туман ҳокимлигининг фойдаланилмаётган объектларни аниқлаш бўйича ишчи гуруҳнинг хулосаси ҳақиқий эмас деб топилган.

Шу орқали яна бир Палата аъзосининг ҳуқуқ ва қонуний манфаатлари ҳимоя қилинди.

ССП Ахборот-хизмати