Жамоатчилик экспертизаси ўтказилган яна бир норматив-ҳуқуқий ҳужжат лойиҳаси хусусида

“Ўзбекистон Республикаси Савдо-саноат палатаси тўғрисида”ги Қонуннинг 22-моддасида белгиланган Савдо-саноат палатасининг қонун ижодкорлиги соҳасидаги ваколатларини амалга оширган ҳолда, Палата томонидан қонунчилик ҳужжатлари лойиҳалари юзасидан Жамоатчилик экспертизалари ўтказилиб, уларнинг тадбиркорлик фаолиятига таъсирини баҳолаган ҳолда, салбий ҳамда ижобий характердаги Хулосалар бериб келинмоқда.

Хусусан, жорий йилнинг ўтган даври мобайнида 211 та норматив-ҳуқуқий ҳужжат лойиҳаси Палата томонидан кўриб чиқилиб, Жамоатчилик экспертизаси хулосалари берилди.

Мисол учун, Ўзбекистон Республикаси Ички ишлар вазирлиги томонидан ишлаб чиқилган Ўзбекистон Республикаси Вазирлар Маҳкамасининг “Автомототранспорт воситалари ҳайдовчиларини тайёрлаш, қайта тайёрлаш ва уларнинг малакасини оширишни амалга оширувчи ўқув ташкилотларининг рейтинг тизимини жорий этиш тўғрисида”ги Қарори
(ID-58682) лойиҳаси  жамоатчилик экспертизасидан  ўтказилиб, у юзасидан қуйидагича Жамоатчилик экспертизаси хулосаси берилди:

1.Лойиҳа 3-банди олтинчи хатбошисига кўра:

ўқув ташкилотлар томонидан нотўғри ёки бузиб кўрсатилган маълумотларнинг ахборот тизимига киритилганлиги, шунингдек, уларни ўз вақтида киритилмаганлик ҳолатлари аниқланганда, лицензия талабларини бузишга тенглаштирилади ҳамда ЙҲХХ томонидан ахборот тизимидан фойдаланиш чекланади;

Таъкидлаш лозимки, ушбу хатбоши билан ўқув ташкилотлар томонидан нотўғри ёки бузиб кўрсатилган маълумотларнинг ахборот тизимига киритилганлик ёки уларни ўз вақтида киритилмаганлик учун мазмунан янги турдаги жавобгарлик чорасини жорий этиш назарда тутилмоқда.

Бироқ, Ўзбекистон Республикаси Президентининг 2020 йил 19 майдаги ПФ-5997-сон Фармони 5-бандига мувофиқ жисмоний ва юридик шахслар учун жавобгарлик белгиловчи ҳуқуқий нормалар фақатгина қонунлар билан ўрнатилиши мумкин.

Яъни, бунда, мазкур хатбоши юқоридаги Фармон талабларига зид келмоқда.

Шу сабабли, лойиҳа 3-банди олтинчи хатбошисини чиқариб ташлаш лозим.

2.Лойиҳа 3-банди еттинчи хатбошисига кўра:

рейтинг тизими ёрдамида аниқланган натижалар ўқув ташкилотларининг лицензияси амал қилишини тўхтатиб туриш ёки тўхтатиш, шунингдек, уни бекор қилишда инобатга олинади;

Таъкидлаш лозимки, лицензия амал қилишини тўхтатиб туриш, тугатиш, ҳамда уни бекор қилиш тартиби ва асослари “Лицензиялаш, рухсат бериш ва хабардор қилиш тартиб-таомиллари тўғрисида”ги Қонунда (32, 33 ва 34-моддалари) белгиланган.

Бунда, ушбу Қонунда назарда тутилмаган лицензия амал қилишини тўхтатиб туриш, тугатиш, ҳамда уни бекор қилиш тартиби ва асосларининг белгиланиши амалда лойиҳанинг мазкур Қонун талабларига зид келиб қолиши ҳолатларига сабаб бўлиши мумкин.

Шунингдек, “Лицензиялаш, рухсат бериш ва хабардор қилиш тартиб-таомиллари тўғрисида”ги Қонунга мувофиқ “автомототранспорт воситалари ва шаҳар электр транспорти воситалари ҳайдовчиларининг малакасини ошириш” фаолияти учун эса ваколатли органни хабардор этиш талаб этилади, яъни ушбу фаолиятни амалга ошириш учун лицензия олиш шарт эмас.

Шу боис, лойиҳа 3-банди еттинчи хатбошисини чиқариб ташлаш лозим.

3.Лойиҳа иловаси 13-бандига кўра:

“Рейтинг натижалари бўйича тегишли ўқув ташкилотида таълим сифатининг самарадорлиги даражасига кўра:

рейтинг тизими ёрдамида аниқланган натижалар ўқув ташкилотларининг лицензияси амал қилишини тўхтатиб туриш ёки тўхтатиш, шунингдек, уни бекор қилишда инобатга олинади;

рейтинг тизими натижаларига асосан йил якуни бўйича “қизил” тоифада деб топилган ўқув ташкилотлари фаолияти ваколатли орган томонидан қонунчилик ҳужжатлари талабларига асосан текширилишига асос бўлади”.

Мазкур Хулоса 3-бандида келтирилган асосларни инобатга олган ҳолда, лойиҳа иловаси 13-банди иккинчи хатбошисини чиқариб ташлаш лозим.

ССП Ахборот-хизмати