Хорижий мутахассислар билан учрашув бўлиб ўтди

2022 йил 12 апрель куни Ўзбекистон Савдо-саноат палатасида  Швейцариянинг “Gherzi” консалтинг компанияси раҳбари Лоран Окутурье ва Германия Халқаро ҳамкорлик ташкилоти (ГИЗ) масъуллари билан учрашув бўлиб ўтди.

Ушбу учрашувда Ўзбекистон Савдо-саноат Палатаси раисининг биринчи ўринбосари И.Жасимов иштирок этди.

Учрашувда хорижий делегация вакиллари республикамизда тўқимачилик соҳасининг жорий ҳолати, унинг истиқболлари, ушбу соҳани янада ривожлантириш юзасидан ҳисобот ишлаб чиқиш, кейинчалик ушбу ҳисоботни оммавий ахборот воситаларида эълон қилиш, ва бу орқали хорижий инвесторлар ва брендларни тўқимачилик йўналишида ҳамкорликка жалб этиш муҳокама этилди.

Шу билан бирга ҳисоботнинг асосий мақсади Ўзбекистоннинг тўқимачилик соҳаси мустақил шарҳини тақдим этиш, республикамизнинг тўқимачилик саноати тўғрисидаги умумий тушунчани Европа ва бошқа хорижий давлатларга етказишдан иборат эканлиги айтиб ўтилди. 

Шунингдек, хорижий томон Ўзбекистон энг қисқа вақт ичида мажбурий ва болалар меҳнатига барҳам беришга муваффақ бўлган ягона давлат эканлиги ва бу тажрибани бошқа давлатга наъмуна бўлиши мумкинлигини таъкидлаб ўтди.

Ўз навбатида Ўзбекистон қисқа муддатда пахтани маҳаллий тўлиқ қайта ишлашга эришган давлатлар қаторида жой олганлигини ва тайёр тўқимачилик маҳсулотлари жаҳон бозорларига кириб бораётганлиги қайд этилди.

Музокара якунида Палата, Швейцария компанияси ва Германия Халқаро ҳамкорлик ташкилоти (ГИЗ) ўзаро ҳамкорлик масалалари ва келажакда амалга ошириладиган ишлар келишиб олидилар.