«Ёш тадбиркорлар» кўргазмаси

Ёшлар мамлакат иқтисодий ҳаётида катта куч ва ғайрат сарфлашга қодир, ҳаракатчан, барча янги ҳодисаларни тез қабул қилувчи ва ўзлаштирувчи жамиятимизнинг фаол қисми ҳисобланади. Сўнгги пайтда мамлакатимизда ёшлар тадбиркорлигини ривожлантириш замонавий иқтисодиётнинг устивор йўналишларидан бири бўлиб бормоқда. Ёшларни тадбиркорлик фаолияти билан шуғулланишини рағбатлантириш чоралари давлат миқёсидаги масалага айланган.

Тадбиркор ёшлар сафининг кенгайиши малакали кадрлар тайёрлаш баробарида миллий иқтисодиётни инновацион ривожланиш йўлидан боришини таъминлайди. Айнан мана шу тараққиёт йўли ёш, ташаббускор, янгича фикрлайдиган тадбиркорлар авлодини шакллантиришни тоқоза этади.

Мамлакатимиз раҳбарининг бу йўналишдаги фармон ва қарорлари ёшлар тадбиркорлигини принцип жиҳатдан янги, ҳар томонлама тўкис даражага олиб чиқиш, ёшлар салоҳиятидан оқилона фойдаланишга чақириқдир.

Ёшларни тадбиркорликка жалб этиш кичик бизнес ва хусусий тадбиркорликни ривожлантириш баробарида яна бошқа муҳим ижтимоий масалалар — ёшлар бандлигини таъминлаш, янги иш ўринлари яратишни ҳам кўзда тутади.

Жорий йилнинг 27 май куни “Ёшлар ижод саройи”да тадбиркорлар кўргазмаси бўлиб ўтди. Тадбир Ёшлар ишлари агентлиги ва “Yoshlar — kelajagimiz” жамғармаси ҳамкорлигида ташкил этилди. Унда мамлакатимизнинг деярли барча ҳудудларидан келган 100 ортиқ ёш тадбиркорлар, ҳунармандлар ва фермерлар ўз маҳсулотларини намойиш этди.

Ушбу кўргазма мамлакатимиз ёш тадбиркор, ҳунарманд ва фермерларининг намунали тажриба ва ютуқларини оммалаштириш, ёшларнинг кичик бизнес ва хусусий тадбиркорликка қизиқишини кучайтириш, уларнинг ташаббускорлик, бунёдкорлик ва ижодий фаолиятини кенгайтириш мақсадида ташкил қилинди.

Кўргазмада иштирок этганлар ўз чиқишларида ёшлар тадбиркорлигини ривожлантириш, аҳоли бандлигини ошириш ва ёшларнинг иқтисодий мустақиллигига эришиш учун шарт-шароитлар яратишнинг устуворлигини таъкидлади.

Ёшларни ўз лойиҳаларини амалга оширишда самарали қўллаб-қувватлаш ва ёшлар тадбиркорлигини ривожлантириш учун қулай шарт-шароитлар яратиш мамлакатлар иқтисодиётларининг ўсишига ижобий таъсир кўрсатиши қайд этилди.

Ўзбекистонда ёшларни давлат томонидан қўллаб-қувватлаш бўйича амалга оширилаётган чора-тадбирлар муҳокама қилинди. Хусусан, ёш фермерларга бепул ер участкалари ажратиш амалиёти, ёшлар саноат ва тадбиркорлик зоналарини яратиш ёшларни молиялаштириш ва субсидиялашнинг бошқа механизмлари борасида ҳам қисқача маълумот берилди.

Кўргазма якунида иштирокчилар бевосита алоқаларни йўлга қўйиш ҳамда ёш тадбиркорлар ўртасида тажриба алмашиш учун самарали платформа бўлишига ишонч билдирди.