“Шифобахш ўсимликлар етиштириш, қайта ишлаш ва уларнинг тиббиётдаги аҳамияти” мавзусидаги илмий амалий семинар ўтказилди

Бугунги кунда мамлакатимизда доривор ўсимликларни муҳофаза қилиш, мавжуд ресурс ва имкониятлардан оқилона фойдаланиб, доривор ва зиравор ўсимликлар етиштириладиган плантациялар ташкил этиш ва уларни қайта ишлаш борасида изчил ислоҳотлар амалга оширилмоқда.

Хусусан, Ўзбекистон Республикаси Президентиниг 2022 йил 20 майдаги “Доривор ўсимликлар хом ашё базасидан самарали фойдаланиш, қайта ишлашни қўллаб-қувватлаш орқали қўшимча қиймат занжирини яратиш чора-тадбирлари тўғрисида”ги ПФ-139-сонли Фармони ҳамда “Доривор ўсимликларни маданий ҳолда етиштириш ва қайта ишлаш ҳамда даволашда улардан кенг фойдаланишни ташкил этиш чора-тадбирлари тўғрисида”ги ПҚ-251-сонли Қарори тасдиқланди.

Жорий йилнинг 1 июнь санасида Ўзбекистон Савдо-саноат палатаси Доривор ва зиравор ўсимлик етиштирувчиларни қўллаб-қувватлаш бўлими томонидан Пойтахтимизнинг Сирғали туманида жойлашган “Flowers garden” кўргазма майдонида доривор ўсимликларнинг маданий плантацияларини барпо этишни қўллаб-қувватлаш, доривор ўсимликларни қайта ишлашни ташкил этиш, шунингдек, касалликларнинг олдини олиш ва даволашда доривор ўсимликларни кенг қўллаш мақсадида “Шифобахш ўсимликлар етиштириш, қайта ишлаш ва уларнинг тиббиётдаги аҳамияти” мавзусидаги илмий амалий семинар ўтказилди.

Мазкур тадбирда соҳага алоқадор вазирлик ва идоралар хусусан, Қишлоқ хўжалиги вазирлиги, Ўрмон хўжалиги давлат қўмитаси ва фармацевтика тармоғини ривожлантириш агентлиги мутасадди раҳбарлари ҳамда Фанлар академияси қошидаги илмий-ишлаб чиқариш институт олимлари ва мутахассислар иштирок этишди.

Семинар давомида дориворчилик соҳасини ривожлантириш, илм-фан ва тадбиркорликни ривожлантириш мақсадида давлат томонидан амалга оширилаётган ишлар, доривор ўсимликлар асосида дори воситалари ва уларнинг тиббиётдаги аҳамиятини ўрганиш борасида илм-фан ютуқлари, фуқаролар саломатлигини таъминлашда халқ табобатининг ролини ошириш борасидаги вазифалар мавзусида тақдимотлар ўтказилди. Тадбир якунида иштирокчилар ўзларининг қизиқтирган саволларига жавоблар олишди.