Қайта тикланувчи электр энергиясига бағишланган кўргазма ўтказилди

2022 йилнинг 18-19 июнь кунлари Шаҳрисабз шаҳридаги “Oq Saroy Textile” МЧЖ биносида қуёш электр панеллари ва сув иситиш қурилмалари ишлаб чиқарувчи ва етказиб берувчи тадбиркорлик субъектлари маҳсулотлари кўргазмаси бўлиб ўтди.

Ўзбекистон Республикаси Президенти Ш.Мирзиёев раислигида жорий йилнинг 10 июнь куни ўтказилган иқтисодиёт тармоқлари, аҳоли ва ижтимоий соҳа объектларида қайта тикланувчи энергия манбаларидан кенг фойдаланиш чора-тадбирлари юзасидан видеоселектор йиғилишидаги топшириқлардан келиб чиқиб,  мазкур кўргазма Ўзбекистон Савдо-саноат палатаси ҳамда “Ўзэлтехсаноат” уюшмаси томонидан ташкиллаштирилди.

Маълумки, давлат раҳбари йил якунига қадар 2 107 та боғчада,
1 минг мактабда, 1 071 та оилавий шифокорлик пунктлари, поликлиника ва шифохоналарда, 1 мингта маҳаллада ташкил этилаётган янги тиббиёт пунктларида, 200 та санаторий ва бошқа дам олиш масканларида қуёш электр панеллари ва сув иситиш қурилмалари ўрнатилиши лозимлиги вазифаси белгилаб берилди.

Мазкур тадбирда туман (шаҳар) ҳокимлари, уларнинг ёрдамчилари, шунингдек, Шаҳрисабз шаҳрига яқин ҳудудлар, хусусан Китоб, Чироқчи, Шаҳрисабз ҳамда Қамаши туманларидаги хўжалик юритувчи субъектлар раҳбарлари ҳамда аҳоли вакиллари иштирок этишди.

Кўргазмани вилоят ҳокими М.Азимов ҳамда Ўзбекистон Савдо-саноат палатасининг раис ўринбосари Ф.Тошпўлатов очиб беришди ва қайта тикланувчи энергиядан фойдаланишни кенгайтиришнинг, бу орқали муқобил энергия ускунасини ўрнатган аҳоли ва тадбиркорларни қўллаб-қувватлаш бўйича янги тизим жорий этиш аҳамияти тўғрисида тўхталиб ўтишди.

Қайта тикланувчи энергиядан фойдаланишни кенгайтириш ҳамда кенг тадбиқ этиш бўйича ташкил этилган кўргазмада ишлаб чиқарувчи ва етказиб берувчи 25 та тадбиркорлик субъектлари ўз маҳсулотлари билан иштирок этишди.

Ушбу кўргазмаларни ташкил этиш ишлари давом эттирилади ва навбатдаги тадбир Сурхондарё вилоятида ташкил қилиниши белгиланган.