Тошкентда WRAP сертификатлаш тизимининг тақдимоти бўлиб ўтди

Ўзбекистон Республикаси Савдо-саноат палатаси, Ўзбекистоннинг АҚШдаги элчихонаси ва халқаро “WRAP” ташкилоти билан ҳамкорликда тўқимачилик маҳсулотларини экспорт қилувчи маҳаллий тадбиркорлик субъектлари учун ишлаб чиқариш жараёнида ижтимоий стандартлар ва хавфсизлик мезонларига мувофиқлигини сертификатлаш бўйича семинар ўтказилди.

Тадбирдан кўзланган мақсад республикамизда тўқимачилик соҳасида фаолият юритаётган маҳаллий тадбиркорларга ушбу йўналишда АҚШ корхоналари томонидан қўйиладиган талаблар шунингдек, ESG стандартларига ва WRAP сертификатлаш тизимига мувофиқлиги, АҚШ ва бошқа хорижий бозорларга чиқиш имкониятлари ва тўқимачилик маҳсулотларини экспорти хажмини ошириш тизими билан таништиришдан иборат.

Worldwide Responsible Accredited Production (WRAP) – халқаро нодавлат нотижорат ташкилоти, 2000 йилда ташкил этилган бўлиб, ишлаб чиқариш жараёнининг ижтимоий стандартлар ва хавфсизлик мезонларига мувофиқлигини сертификатлаштиришга ихтисослашган.

WRAP тўқимачилик корхоналарини ишлаб чиқариш шароитлари, хавфсизлик ва меҳнатни муҳофаза қилиш бўйича жаҳонда тан олинган халқаро стандартларга мувофиқлигини сертификатлайди, ҳусусан, дунёнинг энг йирик савдо корхоналари Wallmart, Disney, Costco, Sears, Kmart, Kontoor, Fruit of the Loom, Gildan, Jockey, Woolworth, Medline WRAP мижози ҳисобланади.

Мазкур тадбирни Ўзбекистон Савдо-саноат палатаси раиси Даврон Ваҳобов ҳамда Ўзбекистон Республикасининг АҚШдаги Фавқулодда ва Мухтор элчиси Жавлон Ваҳобов кириш сўзи билан очиб, сўнгги йилларда Ўзбекистон тўқимачилик саноати мамлакатимиз  иқтисодиётининг жадал ривожланаётган тармоқларидан бирига айланаётганини ва мазкур саноат хорижий инвестицияларни жалб қилиш, аҳоли бандлигини таъминлаш, маҳсулот экспорт қилишда етакчи ўринларни эгаллаб, мамлакатимиз миллий иқтисодиётини ривожлантиришнинг стратегик муҳим йўналишларидан бири ҳисобланишини таъкидлаб ўтдилар.

Шу билан бирга, Америка бозори тўқимачилик тармоғидаги ўзбек ишлаб чиқарувчилари учун энг жозибадор, аммо шу билан бир қаторда халқаро стандартлар ва маҳсулот сифатини сертификатлаш шартларига ва муносиб меҳнатнинг асосий стандартларига мувофиқлиги нуқтаи назаридан ҳам эгаллаш осон бўлмаган бозор ҳисобланишини таъкидладилар.

Шунга мувофиқ, ўзбек корхоналарининг экспорт салоҳияти АҚШ бозорида ҳали ҳам тўлиқ амалга оширилмаганига алоҳида тухталиб ўтдилар. Юқоридагиларни инобатга олган ҳолда, WRAP ташкилотининг роли катта эканлигини таъкидладилар.

Ўзбекистоннинг 100 та энг йирик ишлаб чиқарувчилари ва тайёр тўқимачилик маҳсулотларини экспорт қилувчи корхоналар учун ўтказилган семинар доирасида, WRAP сертификатлаштириш бўйича тақдимот тингланди, унда сертификатлаштиришга қўйиладиган талаб ва шартлар, шунингдек, сертификатлаштиришнинг афзалликлари таъкидланди.

ССП матбуот хизмати