Янги қарорнинг мазмун-моҳияти тадбиркорларга етказилди

Жорий йилнинг 15 октябрь куни Ўзбекистон-Корея тўқимачилик технопарки биносида Ўзбекистон Республикаси Президентининг 2022 йил 12 октябрдаги “Саноат ишлаб чиқаришида хомашё узлуксизлигини таъминлаш бўйича қўшимча қулайликларни яратиш чора-тадбирлари тўғрисида”ги ПҚ-392-сонли қарорининг мазмуни ва моҳиятини маҳаллий тадбиркорларга етказиш мақсадида, Ўзбекистон Савдо-саноат палатаси раиси Д.Вахабов бошчилигида тегишли вазирлик ва идоралар ҳамда йирик тадбиркорлар ўртасида онлайн ва оффлайн форматда давра суҳбати ўтказилди.

Мазкур қарор билан “Божхона ҳудудида қайта ишлаш” божхона режимини янада соддалаштириш, саноат корхоналарининг хомашё таъминотини яхшилаш ва тадбиркорлар учун бошқа бир қатор қулайликлар яратилиши назарда тутилган.

Ушбу тадбиркорлар учун ташкил этилган учрашувда Ўзбекистон Савдо-саноат палатаси, Ўзбекистон Республикаси Инвестициялар ва ташқи савдо вазирлиги, Давлат солиқ қўмитаси ва Божхона қўмитаси вакиллари қатнашди.

Учрашув давомида тадбиркорлар билан тегишли идоралар ўртасида музокаралар ўтказилиб, мавжуд муаммолар ва ечимлар ҳақида маъруза қилинди, шунингдек, қарорга алоқадор бўлган барча саволлар кўриб чикилди.

ССП матбуот хизмати