RUTSIS лойиҳаси доирасида давра суҳбати бўлиб ўтди

2022 йил 22 октябрь куни Марғилон шаҳрининг “IT Маркази”да Савдо-саноат палатасининг «Ўзбекистонда ва Тожикистонда ипакчилик ва икат матолар тармоғини ривожлантиришни рағбатлантириш» (RUTSIS) лойиҳаси доирасида маҳаллий ва хорижий экспертлар иштирокида давра суҳбати ўтказилди.

Давра суҳбати мавзуси икат маҳсулотларини ишлаб чиқариш ва экспорт қилишда эришилган ютуқлар ва мавжуд муаммолар муҳокамасига бағишланган бўлиб, унда Савдо-саноат палатаси, «Ҳунарманд» уюшмаси, Божхона қўмитаси маъсул вакиллари, ипак ва икат маҳсулотларини яратиш бўйича уста ҳунармандлар ҳамда Франция, Болгария, Малайзия, Ҳиндистон давлатларидан ташриф буюрган халқаро экспертлар ва дизайнерлар иштирок этди.

Давра суҳбати давомида ипак ва икат маҳсулотларини яратиш бўйича уста ҳунармандлар ўртасида ҳамкорликни янада ривожлантириш, маҳаллий ва хорижий уста ҳунармандларнинг ишлаб чиқариш ва халқаро бозорларга чиқиш бўйича тажриба алмашинилди, эркин савдо зоналари ва улардаги имкониятлар, шунингдек, ўзаро экпорт ва импортни амалга ошириш бўйича мавжуд қулайликлар ва қийинчиликлар муҳокама қилинди.

Лойиҳа Марказий Осиёда истеъмол ва ишлаб чиқариш амалиёти орқали ипак ва атлас ишлаб чиқаришнинг барқарор ўсишини таъминлашга, шунингдек халқаро бозорларга чиқиш имкониятларини янада кенгайтиришга қаратилган.

ССП матбуот хизмати