“Очиқ мулоқот”дан сўнг амалга оширилган ишлар юзасидан матбуот анжумани

Жорий йил 5 декабрь куни Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида Президент Ш.Мирзиёвнинг тадбиркорлар билан “Очиқ мулоқоти”дан сўнг амалга оширилган ишлар юзасидан матбуот анжумани бўлиб ўтди.

Унда Ўзбекистон Савдо-саноат палатаси раисининг биринчи ўринбосари Ислом Жасимов, Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил ўринбосари Жамшид Урунов ҳамда Инвестициялар ва ташқи савдо вазирлиги бошқарма бошлиғи Баҳром Худойбердиев иштирок этди.

Маълумки, ўтган 2021 йилдан бошлаб давлат раҳбарининг тадбиркорлар билан “очиқ мулоқот” тадбирини ўтказиш амалиёти йўлга қўйилган.

Мазкур “очиқ мулоқот” орқали бизнес ҳамжамияти олдида ечимини кутаётган масалалар, хусусан бу борадаги қонунчилик ҳужжатларини такомиллаштириш, бизнесни молиялаштириш, инвестицияларнинг жозибадорлигини ошириш, солиқ ва божхона маъмурчилигини такомиллаштириш каби бир қатор йўналишларда тадбиркорларнинг муаммолари ва таклифлари асосида ҳужжатлар қабул қилинган. 

Ушбу амалиёт натижасида 2021 йилдан бошлаб тадбиркорлар ҳам ўз байрамларини нишонлайдиган аниқ сана қонун билан белгилаб қўйилди. Жумладан, 20 августни мамлакатимизда “Тадбикорлар куни” сифатида кенг нишонланиши жорий қилинди.

Жорий йилда ҳам давлат раҳбарининг тадбиркорлар билан “очиқ мулоқот” тадбири ўтказилди ва ушбу тадбиргача бўлган жараённинг ўзида ҳам ҳудудларда бизнес вакилларининг индивидул муаммолари ўз ечимини топди.

Жорий йилги  “очиқ мулоқот” якунлари бўйича қабул қилинган қарор билан биринчи марта Ўзбекистон Республикаси Президенти ҳузурида Ўзбекистон Республикаси Президенти Администрацияси раҳбари раислигида Тадбиркорликни қўллаб-қувватлаш бўйича жамоатчилик кенгаши ташкил қилинди ва қарор билан кенгашнинг вазифалари ҳам белгилаб олинди.

Маълумки, давлат раҳбарининг тадбиркорлар билан ўтказилган “очиқ мулоқот”да белгилаб берилган вазифаларни амалга ошириш юзасидан ПҚ-364-сонли Президент қарори қабул қилинган ва ушбу қарор билан 42 та банддан иборат “йўл харитаси” ҳам тасдиқланган.

“Йўл харитаси” ижроси юзасидан 55 та ҳужжат қабул қилиниши белгиланган бўлиб, булар - 6 та Қонун, 24 та Ўзбекистон Республикаси Президенти ҳужжатлари (жумладан 6 та Фармон ва 5 та қарор), 12 та Вазирлар Маҳкамаси қарорлари ҳамда 13 та бошқа турдаги ҳужжатлар. Шунингдек, “йўл харитаси”га 25 та бошқа чора-тадбирларни амалга ошириш ҳам киритилган.

Матбуот анжуманида “очиқ мулоқот”да белгилаб берилган вазифаларнинг ижроси юзасидан қабул қилинган ҳужжатлар, уларнинг тадбиркорлик субъектлари фаолиятига таъсири юзасидан батафсил ахборотлар бериб ўтилди.

https://www.facebook.com/aoka.uz/videos/678112400368359/ 

ССП матбуот хизмати