Гўшт, сут ва туҳум етиштирувчи тадбиркорлар билан учрашув

Жорий йилнинг 15-декабрь куни “Frankfort Hotel and Spa” меҳмонхонасида Ўзбекистон Республикаси Савдо-саноат палатаси ҳамда Қишлоқ хўжалиги вазирлиги, Ветеринария ва чорвачиликни ривожлантириш давлат қўмитаси ҳамкорлигида гўшт, сут ва туҳум етиштирувчи тадбиркорлар дуч келаётган муамоларни муҳокама қилиш ва ушбу маҳсулотларни таннархини тушириш мақсадида мутасадди вазирлик ва идоралар иштирокида давра суҳбати ўтказилди.

Ушбу тадбир чорвачилик ва паррандачилик соҳасини янада ривожлантириш ва озуқа базасини мустаҳкамлаш мақсадида тадбиркорлик субъектларининг муаммоларини ўрганиш, уларни бартараф этиш ҳамда муаммолар ечими юзасидан таклифлар ишлаб чиқишга бағишлангандир.

Тадбирни Ўзбекистон Савдо-саноат палатаси раиси Даврон Ваҳобов кириш сўзи билан очиб, иштирокчиларни чорвачилик ва паррандачилик соҳасидаги тадбиркорларнинг муаммоларини аниқлашга, таклифлар беришга, ҳамда уларни шакллантиришда фаол иштирок этишга чақирди.

Zoom конференция орқали Савдо-саноат палатасининг 14 та ҳудудий бошқармаларидан 150 га яқин ушбу соҳадаги тадбиркорлар қатнашди.

Таъкидлаш жоизки, мамлакатимиз раҳбариятининг аҳолини рози қилишга қаратилган изчил ижтимоий сиёсати туфайли озиқ-овқат маҳсулотлари нархининг кескин кўтарилиши кузатилмаяпти. Бу борада амалга оширилаётган чора-тадбирлар бозор механизмларининг барқарор ишлашига хизмат қилмоқда.

Гўшт, сут, тухум каби маҳсулотлар аҳолининг кундалик истеъмол харажатларининг 30 фоизини ташкил қилади. Бошқа соҳаларда бўлгани каби чорвачиликда ҳам ҳосилдорликни ошириш ва мамлакатимиз озиқ-овқат хавфсизлигини таъминлаш мақсадида инновациялар жорий этилмоқда.

Республикада халқаро молия ташкилотларининг грант маблағларини жалб этиш бўйича ишлар йўлга қўйилган. Хусусан, Бирлашган Миллатлар Ташкилотининг Озиқ-овқат ва қишлоқ хўжалиги ташкилоти билан ветеринария, чорвачилик, асаларичилик, балиқчиликни ривожлантириш бўйича тўққизта лойиҳа амалга оширилмоқда.

Мазкур тадбирдан кўзланган асосий мақсад тадбиркорлар билан ушбу соҳадаги муаммоларни очиқ муҳокама қилиш ва конструктив ечимларни излаш учун платформа яратишдан иборат.

Тадбир сўнгида аниқланган муаммолар юзасидан тадбиркорлик субъектларидан таклифлар таҳлил қилинди, муаммоларнинг аксарияти тадбир давомида тегишли вазирлик ва идоралар томонидан ҳал этилди, айрим масалалар бўйича эса топшириқлар берилди.

https://www.youtube.com/watch?v=QuClm0pNVZU

ССП матбуот хизмати