Савдо-саноат палатасида Индонезиянинг Ўзбекистондаги элчиси билан учрашув бўлиб ўтди

Жорий йилнинг 1 июн куни Ўзбекистон Савдо-саноат палатаси раиси Даврон Вахабов ва Индонезиянинг Ўзбекистондаги элчиси Сунарё Картадината ўртасида учрашув бўлиб ўтди.

Учрашувдан кўзланган мақсад икки давлат ўртасидаги савдо-иқтисодий алоқаларни ривожлантириш юзасидан фикр алмашиш, шунингдек, икки давлат Савдо-саноат палаталари ўртасида учрашув ташкил этиш имкониятларини кўриб чиқишдан иборат.

Таъкидлаш жоизки, Индонезия Савдо-саноат палатаси (KADIN Indoneziya) Индонезия тадбиркорлик палаталари ва уюшмаларининг қуйи ташкилоти бўлиб, 34 та ҳудудий палата ва 514 та туман бўлимларига эга.

KADIN Indoneziya хусусий бизнес номидан иш юритиш ваколатига эга бўлган ягона умуммиллий бизнес ташкилоти бўлиб, вазирликлар ва идоралар билан имтиёзли муносабатларни сақлаб, хусусан, барча тегишли тармоқларни қамраб олади.

Учрашувда Индонезия элчиси томонидан 2024-йилда биринчи Индонезия-Ўзбекистон бизнес-форумини, шунингдек, савдо миссиялари ва ишбилармонлик учрашувларини биргаликда ташкил этиш орқали ўзаро товар айирбошлаш ҳажмини ошириш таклифи билдирилди.

ССП матбуот хизмати