“UZstore” халқаро кўргазмаси ўз ишини бошлади

Ўзбекистон Республикаси ва Хитой Халқ Республикаси ўртасидаги савдо-иқтисодий ва сармоявий алоқаларни ривожлантириш мақсадида 25-27 октябрь кунлари Tashkent INDEX мажмуасида “UZstore” халқаро кўргазмаси бўлиб ўтади.

Тадбир Ўзбекистон Савдо-саноат палатаси кўмагида ўтказилмоқда.

Кўргазмада Хитой Халқ Республикасидан 70 дан ортиқ компания — қурилиш, машина ва ускуналар, энергетика соҳалари, турли бизнес йўналишларнинг кўплаб мутахассислари, шунингдек, ,Ўзбекистон ва хорижий йирик компаниялар вакиллари иштирок этмоқда.

Мазкур тадбирдан кўзланган мақсад Ўзбекистон иқтисодиёти тармоқлари салоҳиятини ва икки мамлакат ҳудудлари ўртасидаги саноат кооперациясини очиб беришдан иборат. Тадбир доирасида Ўзбекистон ва Хитой тадбиркорлари янги алоқалар ўрнатишга, келгусидаги ҳамкорликнинг амалий жиҳатларини муҳокама қилишга муваффақ бўладилар.

Таъкидлаш жоизки, икки мамлакат ўртасидаги савдо-иқтисодий ва сармоявий алоқалар изчил суръатда ўсиб келаётганлиги таъкидланди. 2022 йил охирида товар айирбошлаш ҳажми 20 фоизга ошиб, рекорд даражадаги 9 миллиард долларга етди. Шу билан бирга, икки давлат Раҳбарлари бу кўрсаткични жорий йилда 10 миллиард долларга етказиш бўйича аниқ вазифани қўйдилар, бунга эса биргаликдаги саъй-ҳаракатлар ва мувофиқлаштирилган тадбирлар орқали эришиш мумкин.

Инвестициявий йўналишда ҳам барқарор ўсиш кузатилмоқда. 2017 йилдан буён ўзлаштирилган Хитой инвестицияларининг умумий ҳажми 5 бараварга ошиб, 11 миллиард долларни ташкил этди. 2022 йилнинг ўзидаёқ Хитой сармоясининг 2,2 миллиард доллари ўзлаштирилди. Ўзбекистонда сўнгги 5 йил ичида ХХР билан қўшма корхоналар сони 3 баробарга ошди.

ССП матбуот хизмати