Германия-Евроосиё иқтисодий иттифоқи делегацияси билан давра суҳбати

Жорий йилнинг 7 ноябрь куни Ўзбекистон Савдо-саноат палатасида Германия-Евроосиё иқтисодий иттифоқи делегациясининг мамлакатимизга ташрифи доирасида вазирлик ва идоралар, шунингдек, икки давлат ишбилармон доиралари ўртасида давра суҳбати бўлиб ўтди.

Германия-Евроосиё иқтисодий иттифоқи Германия ва Евроосиё мамлакатлари ўртасидаги иқтисодий муносабатларни ривожлантириш ва қўллаб-қувватлашдан манфаатдор бўлган ўрта (оилавий) компаниялар ва барча соҳалардаги фаол шахслар ва профессионал гуруҳларининг мустақил, партиясиз вакилидир.

Мазкур тадбирдан кўзланган асосий мақсад Ўзбекистон Савдо-саноат палатаси ва Германия делегацияси иштирокчилари ўртасида ишбилармонлик алоқаларини ўрнатиш, Ўзбекистонда амалга оширилаётган йирик сармоявий лойиҳаларни тақдим этиш ва муҳокама қилиш, шунингдек, ҳамкорликни янада чуқурлаштиришнинг устувор йўналишларини белгилашдан иборат.

Ўзбекистон Савдо-саноат палатаси раисининг биринчи ўринбосари Ислом Жасимов ва Германия-Евроосиё иқтисодий иттифоқи президенти Томас Овербек кириш сўзи билан тадбирни очиб берди.

Тадбирда Германиянинг машинасозлик, металлга ишлов бериш, қурилиш, қишлоқ хўжалиги, саноат чиқиндиларини қайта ишлаш ва бошқа соҳаларда фаолият юритувчи
17 та компания вакиллари иштирок этди.

Ўзбекистон ва Германия ишбилармонлари ўртасида Б2Б музокаралари ўтказилиб, Ўзбекистон Савдо-саноат палатаси ва Германия-Евроосиё иқтисодий иттифоқи ўртасида савдо-иқтисодий ҳамда илмий-техникавий алоқаларни мустаҳкамлаш ва кенгайтириш мақсадида ҳамкорлик меморандуми имзоланди.

Якунда томонлар музокаралар натижаларидан мамнун эканликларини билдириб, қўшма тадбирларни амалга ошириш бўйича келгусида ҳамкорлик қилишга келишиб олдилар.

Ташриф доирасида Тошкент ва Самарқанд металлургия заводи, ҳамда Олмалиқ кон-металлургия комбинатига ташриф буюриш режалаштирилган.

ССП матбуот хизмати