Текстиль соҳасидаги оқова сувларни тозалашда илк қадам

Хитойнинг йирик тўқимачилик корхоналарида бўлган Ўзбекистон Савдо-саноат палатаси делегацияси хитойликларнинг экология ва сувга бўлган муносабатига ўз кўзлари билан гувоҳ бўлдилар. Хитой тажрибаси кишини лол қолдирмасдан қолмайди, албатта.

Ҳозирги кунда Хитой текстиль соҳасида жаҳон бозорига чиқиб бўлган. Бу ерда тўқимачилик соҳасидаги бўёқлашдан чиқаётган оқова сувни тозалашнинг замонавий усуллари йўлга қўйилган. 

Асосий мақсад – ушбу жаҳон даражасидаги усулларни Ўзбекистонга татбиқ қилиш. Айни пайтда модернизация бўлган янги инновацион технологиялар билан сувни тозалаётган кам сонли давлатлардан бири – бу Хитой. Хитойда экологияга қўйилган талаб ҳам бошқа давлатларга қараганда энг юқори саналади. Сабаби бу ерда аҳоли кўп, зарарланиш эҳтимоли катта.

Палата вакиллари ташриф буюрган завод 1994 йили кичик қувватда иш бошлаган бўлиб, 2019 йилдан буён 30 минг метр куб қувват билан ишлаб келмоқда.

Эндиликда текстиль боёқлаш соҳасидаги оқова сувларни тозалаш ускуна ва қурилмаларини Ўзбекистонга жалб этиб, матоларни бўёқлаш соҳасини ривожлантириш ҳамда экспорт салоҳиятини жаҳон стандартларининг талаб даражаларига олиб чиқиш режа қилинган.

Бу борадаги амалий ишлар соҳа мутахассислари билан Савдо-саноат палатаси томонидан ташкиллаштирилмоқда. Хитой тажрибасидан келиб чиқиб, тез орада Тошкент вилояти Юқори Чирчиқ туманида 50 минг метр куб оқова сувни тозалаш иншооти ташкил этилиши кўзда тутилган.

ССП матбуот хизмати