Ёш тадбиркорлар билан очиқ мулоқот

Жорий йилнинг 21 декабрь куни Тошкент тўқимачилик ва енгил саноат институтида 500 нафар ёшлар иштирокида “Ёш тадбиркорлар форуми” бўлиб ўтди.

Ушбу тадбирдан кўзланган мақсад тадбиркорликни ёшлар ўртасида ривожлантириш, ёшларнинг тадбиркорлик йўналишидаги фикр-мулоҳазаларини тинглаш, бугунги кунда тадбиркорларга яратилаётган шароитлар ва имтиёзлар, амалга оширилаётган янгидан-янги лойиҳалар ҳақида тушунча бериш.

Маълумки, давлатимиз томонидан бу борада яхлит тизим яратилган бўлиб,  ёшларнинг бизнес ташаббуслари, ғоялари ва лойиҳаларини рўёбга чиқаришга кўмаклашилмоқда ва шу орқали уларнинг бандлиги таъминланмоқда.

Тадбирни Савдо-саноат палатаси раиси ўринбосари Жамшед Ураков кириш сўзи билан очиб, мамлакатимиздаги ёш тадбиркорларни қўллаб-қувватлаш ва уларни қўлга киритган ютуқлари ҳақида очиқ мулоқот ўтказилди.

Шунингдек учрашувда “ФЕЭДУП” МЧЖ раҳбари Умид Иргашев, “БОНИТО GROUP” МЧЖ раҳбари Сайдулла Салиев, ЮСТЕХ” МЧЖ раҳбари Акмал Юсупов иштирок этиб, ўз билим ва тажрибаларини ёшлар билан ўртоқлашишди.

Таъкидлаш жоизки, Давлат раҳбари томонидан ёшларни қўллаб-қувватлаш бўйича амалга оширилаётган кенг кўламли қўллаб-қувватлашларга Ўзбекистон Савдо-саноат палатаси ҳам ўзининг муносиб ҳиссасини қўшиб келаётганини таъкидлаб ўтди.

Хусусан, Ўзбекистон Республикаси Президентининг 2020 йил 13 октябрдаги “Аҳолини тадбиркорликка жалб қилиш тизимини такомиллаштириш ва тадбиркорликни ривожлантиришга доир қўшимча чора-тадбирлари тўғрисида” ПҚ-4862-сонли қарори асосида ёшларни тадбиркорлик асослари ўқув курсларида 53 381 нафар ёшлар ўқитилган бўлса, шундан 45 371 нафари ёшларга курсларни муваффақиятли тамомлаганлиги бўйича сертификатлар билан тақдирланган.

Ёшларни нафақат бизнес кўникмаларини ошириш балки ташаббусларини рўёбга чиқариш бўйича ҳам тизимли чоралар кўрилмоқда. Жумладан, Ўзбекистон Республикаси Вазирлар Маҳкамасининг 2021 йил 21 декабрдаги “Ёшларни тадбиркорликка жалб қилиш ва уларнинг бизнес ташаббусларини қўллаб-қувватлаш бўйича қўшимча чора-тадбирлар тўғрисида” ВМ-765-сон қарори асосида 441 нафар ёшларнинг “Стартап” лойиҳаларини амалга ошириш учун 210 млрд.сўм кредит маблағлари ажратилди.

Тадбир давомида берилган қизиқарли ва фойдали маълумотлар асосида савол-жавоблар ўтказилиб, муҳокамалар жараёнида кўтарилган барча мурожаатлар ва таклифлар тингланди. Шунингдек, бу каби учрашувлар ёшларни тадбиркорликка бўлган қизиқишини янада орттиришига туртки бўлиши таъкидлаб ўтилди.

Шунингдек, тадбир доирасида кўргазма ҳам ташкил қилинди.

ССП Матбуот хизмати