ТИЖОРАТ АРБИТРАЖИ ВА ҲАКАМЛИК МУҲОКАМАСИ СОҲАСИДА ХАЛҚАРО ҲАМКОРЛИК

2018 йил 15 мартда Ўзбекистон Республикаси Савдо-саноат палатаси ҳузуридаги Халқаро тижорат арбитраж (ҳакамлик) судининг раиси Фозилжон Отахонов Европа тикланиш ва тараққиёт банкининг катта юридик маслаҳатчиси  Алексей Зверев ва банкнинг бошқа вакиллари билан учрашди.

Учрашувда Халқаро тижорат арбитраж суди ва Ҳакамлик судларининг ташкил қилиниши, уларнинг фаолияти ҳамда Ўзбекистон Республикасининг “Халқаро тижорат арбитражи тўғрисида”ги Қонуни лойиҳаси мазмун-моҳияти билан меҳмонлар таништирилди.

Европа тикланиш ва тараққиёт банки вакиллари низоларни муқобил ҳал қилиш усулларини кенг тарғиб қилиш, шунингдек ҳакамлик судьялари ва арбитрлар малакасини ошириш бўйича семинар-тренинглар ташкил қилиш, халқаро тижорат арбитражи тўғрисидаги қонун қабул қилингандан кейин халқаро конференция ўтказиш бўйича ҳамкорлик масалаларини муҳокама қилишга тайёр эканликларини билдирдилар.

Тарафлар ҳамкорликни иккала томон учун ҳам манфаатли келишувлар доирасида давом эттиришга келишиб олдилар.

ЎзССП Ахборот хизмати