Ўзбекистон-Покистон ишбилармонлар Кенгашининг йиғилиши бўлиб ўтди.

2018 йилда Ўзбекистон Республикаси ва Покистон Ислом Республикаси ўртасида алоқалар мустаҳкамланиб бормоқда.

Жорий йилнинг март ойида Ўзбекистон Савдо-саноат палатасида ва Халқаро ва стратегик тадқиқотлар маркази билан Ўзбекистон-Покистон ишбилармонлар Кенгашини тузиш тўғрисида келишув имзоланди ҳамда апрел ойида Кенгашнинг биринчи йиғилиши Исломободда ўтказилди.

Шу билан бирга, Ўзбекистон Республикаси ва Покистон Ислом Республикаси савдо-иқтисодий алоқаларни мустаҳкамлаш мақсадида Ўзбекистон Савдо-саноат палатаси ва Ўзбекистоннинг Покистондаги элчихонаси ҳамкорлигида Исломобод шаҳрида ишбилармонлар Кенгаши раиси ўринбосари Васик Али Хан бошчилигида Ўзбекистон-Покистон ишбилармонлар Кенгаши йиғилиши бўлиб ўтди.

Мазкур учрашувдан кўзланган мақсад Ўзбекистонда ишлаб чиқарилаётган маиший техника ва қурилиш маҳсулотлари кўргазмасини (шоу-рум) Покистондаги Карачи, Лахор ва Равалпиндида очиш ҳамда келажагда бу маҳсулотларини бутун Покистон бўйлаб етказишдан иборат.

Жорий йилнинг 9 июл куни Ўзбекистон Савдо-саноат палатасида Ўзбекистон-Покистон ишбилармонлар Кенгаши вакиллари иштирокида учрашув бўлиб ўтди.

Учрашув давомида Покистон ишбилармон доира вакиллари Ўзбекистон олиб борилаётган ишбилармонлик муҳитини билан танишдилар. “2017-2021 йилларда Ўзбекистон Республикасини ривожлантиришнинг бешта устувор йўналишлари бўйича Ҳаракатлар стратегияси” нинг асосий мақсад ва вазифалари билан танишдилар. Шунингдек, “Фаол тадбиркорлик, инновацион ғояларни қўллаб-қувватлаш йили” доирасида мамлакатимизда олиб борилаётган тадбиркорликни қўллаб-қувватлаш ва қулай инвестиция муҳитини яратиш бўйича кўрилган чора-тадбирлар ҳақида маълумот берилди.

Учрашув давомида томонлар ўзаро ҳамкорлик алоқаларини янада мустаҳкамлаш учун Покистон бозорларига Ўзбекистонда ишлаб чиқарилган маҳсулотларни етказиш масаласи кўрилди. Жумладан, қимёвий ўғитлар ва чарм пойавзал, мева ва савзавот маҳсулотларини, фармацевтика, қишлоқ хўжалиги техникалари, курилиш материалларини ишлаб чиқаришда, электро ва маиший техника, текстил ҳамда туризм соҳаларида ўзаро ҳамкорлик алоқаларини ўрнатиш ҳақида келишиб олинди.

Покистон Ислом Республикаси томонидан ташриф буюрган делегация вакиллари томонидан ўзбек компанияларининг Покистонда дилерлик офисларини ташкил этишда ёрдам беришга тайёрлигини билдирди. Келажакда фармацевтика соҳасидаги ҳамкорликни янада кучайтиришда  махсус фармацевтика зоналарини ташкил этишни кенгайтиришга келишилди.

Шунингдек, томонлар ўзаро тарихий ва диний туризмни биргаликда ривожлантириш масаласини муҳокама қилдилар.Покистоннинг диққатга сазовор тарихий обидалари ва Ўзбекистоннинг муқаддас зиёратгоҳлари сайёхларда катта қизиқиш уйғотмоқда.

Учрашув сўнгида Ўзбекистон-Покистон ўртасида қўшма лойиҳаларни амалга ошириш бўйича келишувга эришилди ва икки томонлама савдо-иқтисодий алоқаларни ривожлантириш бўйича Ўзбекистон-Покистон бизнес-форумининг Котибиятига таклифлар киритилди ҳамда 2018 йилнинг сентябр ойида Тошкентдаги ишбилармонлар Кенгаши иккинчи йиғилиши ўтказилишига келишилди.

Ташриф доирасида делегация вакиллари мамлакатимизнинг тарихий шаҳарлари Самарқанд ва Бухорога, “Ангрен ЭИЗ”, “Ўзагротехсаноатхолдинг” АЖ, “Ўзқурилишматериаллари” АЖ, Ўзбекистон Республикаси Туризмни ривожлантириш давлат қўмитасига, Тошкент вилояти ҳокимиятига шунингдек, “Artel”АЖ нинг ишлаб чиқарувчи заводларига ташриф буюришди. Мазкур делегация ташрифи шу йилнинг 12 июлигача давом этади.

Шуни таъкидлаб ўтиш керакки, 2017 йилда Ўзбекистон-Покистон ўртасида ўзаро товар айланмаси қарийиб 36,2 млн. АҚШ долларни (экспорт – 9,9 млн АҚШ доллар, импорт- 26,3 млн. АҚШ доллар) ни ташкил қилди.

2017 йилда Ўзбекистоннинг Исломободдаги элчихонаси қошида “Ўзбекистонда ишлаб чиқарилган” белгиси остидаги доимий фаолият юритувчи кўргазма ташкил этилди ва Тошкент ва Лахор ўртасида тўғридан-тўғри авиақатновлар йўлга қўйилди.

ЎзССП Матбуот хизмати