O'zbekiston-Pokiston ishbilarmonlar Kengashining yig'ilishi bo'lib o'tdi

2018 yilda O'zbekiston Respublikasi va Pokiston Islom Respublikasi o'rtasida aloqalar mustahkamlanib bormoqda.

Joriy yilning mart oyida O'zbekiston Savdo-sanoat palatasida va Xalqaro va strategik tadqiqotlar markazi bilan O'zbekiston-Pokiston ishbilarmonlar Kengashini tuzish to'g'risida kelishuv imzolandi hamda aprel oyida Kengashning birinchi yig'ilishi Islomobodda o'tkazildi.

Shu bilan birga, O'zbekiston Respublikasi va Pokiston Islom Respublikasi savdo-iqtisodiy aloqalarni mustahkamlash maqsadida O'zbekiston Savdo-sanoat palatasi va O'zbekistonning Pokistondagi elchixonasi hamkorligida Islomobod shahrida ishbilarmonlar Kengashi raisi o'rinbosari Vasik Ali Xan boshchiligida O'zbekiston-Pokiston ishbilarmonlar Kengashi yig'ilishi bo'lib o'tdi.

Mazkur uchrashuvdan ko'zlangan maqsad O'zbekistonda ishlab chiqarilayotgan maishiy texnika va qurilish mahsulotlari ko'rgazmasini (shou-rum) Pokistondagi Karachi, Laxor va Ravalpindida ochish hamda kelajagda bu mahsulotlarini butun Pokiston bo'ylab etkazishdan iborat.

Joriy yilning 9 iyul kuni O'zbekiston Savdo-sanoat palatasida O'zbekiston-Pokiston ishbilarmonlar Kengashi vakillari ishtirokida uchrashuv bo'lib o'tdi.

Uchrashuv davomida Pokiston ishbilarmon doira vakillari O'zbekiston olib borilayotgan ishbilarmonlik muhitini bilan tanishdilar. “2017-2021 yillarda O'zbekiston Respublikasini rivojlantirishning beshta ustuvor yo'nalishlari bo'yicha Harakatlar strategiyasi” ning asosiy maqsad va vazifalari bilan tanishdilar. Shuningdek, “Faol tadbirkorlik, innovatsion g'oyalarni qo'llab-quvvatlash yili” doirasida mamlakatimizda olib borilayotgan tadbirkorlikni qo'llab-quvvatlash va qulay investitsiya muhitini yaratish bo'yicha ko'rilgan chora-tadbirlar haqida ma'lumot berildi.

Uchrashuv davomida tomonlar o'zaro hamkorlik aloqalarini yanada mustahkamlash uchun Pokiston bozorlariga O'zbekistonda ishlab chiqarilgan mahsulotlarni etkazish masalasi ko'rildi. Jumladan, qimyoviy o'g'itlar va charm poyavzal, meva va savzavot mahsulotlarini, farmatsevtika, qishloq xo'jaligi texnikalari, kurilish materiallarini ishlab chiqarishda, elektro va maishiy texnika, tekstil hamda turizm sohalarida o'zaro hamkorlik aloqalarini o'rnatish haqida kelishib olindi.

Pokiston Islom Respublikasi tomonidan tashrif buyurgan delegatsiya vakillari tomonidan o'zbek kompaniyalarining Pokistonda dilerlik ofislarini tashkil etishda yordam berishga tayyorligini bildirdi. Kelajakda farmasevtika sohasidagi hamkorlikni yanada kuchaytirishda  maxsus farmasevtika zonalarini tashkil etishni kengaytirishga kelishildi.

Shuningdek, tomonlar o'zaro tarixiy va diniy turizmni birgalikda rivojlantirish masalasini muhokama qildilar.Pokistonning diqqatga sazovor tarixiy obidalari va O'zbekistonning muqaddas ziyoratgohlari sayyoxlarda katta qiziqish uyg'otmoqda.

Uchrashuv so'ngida O'zbekiston-Pokiston o'rtasida qo'shma loyihalarni amalga oshirish bo'yicha kelishuvga erishildi va ikki tomonlama savdo-iqtisodiy aloqalarni rivojlantirish bo'yicha O'zbekiston-Pokiston biznes-forumining Kotibiyatiga takliflar kiritildi hamda 2018 yilning sentyabr oyida Toshkentdagi ishbilarmonlar Kengashi ikkinchi yig'ilishi o'tkazilishiga kelishildi.

Tashrif doirasida delegatsiya vakillari mamlakatimizning tarixiy shaharlari Samarqand va Buxoroga, “Angren EIZ”, “O'zagrotexsanoatxolding” AJ, “O'zqurilishmateriallari” AJ, O'zbekiston Respublikasi Turizmni rivojlantirish davlat qo'mitasiga, Toshkent viloyati hokimiyatiga shuningdek, “Artel”AJ ning ishlab chiqaruvchi zavodlariga tashrif buyurishdi.

Mazkur delegatsiya tashrifi shu yilning 12 iyuligacha davom etadi. Shuni ta'kidlab o'tish kerakki, 2017 yilda O'zbekiston-Pokiston o'rtasida o'zaro tovar aylanmasi qariyib 36,2 mln. AQSh dollarni (eksport – 9,9 mln AQSh dollar, import- 26,3 mln. AQSh dollar) ni tashkil qildi. 2017 yilda O'zbekistonning Islomoboddagi elchixonasi qoshida “O'zbekistonda ishlab chiqarilgan” belgisi ostidagi doimiy faoliyat yurituvchi ko'rgazma tashkil etildi va Toshkent va Laxor o'rtasida to'g'ridan-to'g'ri aviaqatnovlar yo'lga qo'yildi.

O'zSSP Matbuot xizmati