Наманган шаҳрида тадбиркорлик субъектларига оид 60 та масала ижобий ҳал этилди

Албатта, бундай  ютуқ  ва муваффақиятлар кўламини кенгайиши  давлатимиз томонидан ишбилармонларга яратилаётган шарт-шароит, имкониятлардан тўғри  ва самарали  фойдаланишга  боғлиқ. Масаланинг яна бир жиҳати, уларнинг фаолиятига тўсиқ бўлаётган, қийинчилик туғдираётган  муаммоларни  ўз ўрнида  ҳал этилиши, маслаҳат   ва  кўмак берилиши ижобий натижаларга асос бўлади. Айнан шуни ҳис этган ҳолда вилоят  ҳокимлиги, вилоят прокуратураси томонидан тадбиркорлар иштирокида очиқ мулоқотлар ташкил этилмоқда.

Наманган шаҳридаги “Ёшлар маркази”да ташкил этилган навбатдаги учрашувда банк, молия, солиқ бошқармаси ва яна бир қатор ҳамкор  ташкилотлар раҳбар ва мутахассислари,  шунингдек,  шаҳар ва туманлардан келган 150 нафардан ортиқ  тадбиркорлар иштирок  этдилар.

Очиқ мулоқот давомида тадбиркорлар ўзларини қизиқтирган саволларга  жавоб  олдилар. Вилоят ҳокими Хайрулло Бозаров уларнинг  ҳар бири билан алоҳида-алоҳида  суҳбатлашар экан,  айрим тадбиркорларнинг  эътирозига сабаб бўлган масалалар  юзасидан мутасаддиларга тегишли топшириқ берди ва улардан масъулият талаб этди. Шу ўринда таъкидлаш жоизки, кейинги йилларда тадбиркорларга эркинлик бериш, қулай ишбилармонлик муҳитини  яратиш мақсадида 10 дан ортиқ норматив ҳужжатлар қабул қилинди. Бу эса улар учун катта имкониятлар эшигини очмоқда.

Ўз ССП Матбуот хизмати