Ўзбекистон Республикаси Президентининг ФАРМОЙИШИ

Маданият ва истироҳат боғларининг моддий-техник базасини мустаҳкамлаш, уларни замонавий аттракционлар ва ўйин қурилмалари билан таъминлаш тўғрисида

Маданият ва истироҳат боғларнинг аҳолига хизмат кўрсатиш хажмини кенгайтириш ва сифатини ошириш, болалар ва ўсиб келаётган ёш авлодга маданиятли ҳордиқ олиши учун қулай шарт-шароитлар яратиш мақсадида:

1. Ўзбекистон Республикасида ишлаб чиқарилмайдиган, хўжалик юрутувчи субъектлар томонидан олиб келинадиган аттракционлар, ўйин қурилмалари ва бутловчи буюмлар 2020 йилнинг 31 декабригача божхона тўловларидан (божхона расмийлаштируви йиғимларидан ташқари) озод этилсин.

Маълумот учун қабул қилинсинки, мазкур фармойишга мувофиқ божхона тўловлари бўйича имтиёзлар қўлланилган ҳолда Ўзбекистон Республикаси ҳудудига олиб келинадиган ( импорт қилинадиган) аттракционлар, ўйин қурилмалари ва бутловчи буюмлар рўйхати “Ўзбекистон Республикаси Президенти ҳузуридаги Лойиҳа бошқаруви миллий агентлиги қошидаги Лойиҳалар ва импорт контрактларини комплекс экспертиза қилиш маркази” ДУКда комплекс экспертизадан ўтказилади.

2. Ушбу фармойиш доирасида бўшайдиган маблағлар маданият ва истироҳат боғлари моддий-техник базасини мустаҳкамлаш, инфратузулмасини ривожлантириш, ҳудудларини кўкаламзорлаштириш ва ободонлаштиришга мақсадли йўналтирилиши назарда тутилсин.

3. Ўзбекистон Республикаси Давлат солиқ қўмитаси (Б. Мусаев) Давлат божхона қўмитаси (М. Азимов) билан биргаликда мазкур фармойишга мувофиқ олиб келинадиган аттракционлар, ўйин қурилмалари ва бутловчи буюмлардан мақсадли фойдаланиши устидан қатъий назорат ўрнатсинлар.

4. Белгилансинки, мазкур фармойишга мувофиқ олиб келинадиган аттракционлар, ўйин қурилмалари ва бутловчи буюмлардан мақсадга номувофиқ фойдаланилган тақдирда божхона имтиёзлари берилиши туфайли тўланмаган божхона тўловлари суммаси қонунчиликда назарда тутилган тартибда молиявий санкциялар қўлланилган ҳолда Ўзбекистон Республикаси Давлат бюджетига ундирилади.

5. Мазкур фармойишнинг ижросини назорат қилиш Ўзбекистон Республикасининг Бош вазири А.Н. Арипов, Ўзбекистон Республикаси Президенти маслаҳатчисининг ўринбосари Ф.Ш. Махмудов ва Ўзбекистон Республикаси Бош вазирининг ўринбосари – молия вазири Ж.А. Қўчқоров зиммасига юклансин.

Ўзбекистон Республикаси Президентининг “Маданият ва истироҳат боғларининг моддий-техник базасини мустаҳкамлаш, уларни замонавий аттракционлар ва ўйин қурилмалари билан таъминлаш тўғрисида”ги 2018 йил 3 октябрдаги Ф-5380-сонли фармойиши.


Ўз ССП Ахборот ҳизмати t.me/uzchamber