“Ўзбекистон ва Туркия ўртасида инвестициявий ва савдо-иқтисодий ҳамкорликни янада ривожлантириш ва кенгайтириш истиқболлари” .

Ўзбекистон Савдо саноат палатаси томонидан Ўзбекистон Республикаси Олий Мажлиси Сенати ҳамда Туркиянинг мустақил ишлаб чиқарувчилар ва тадбиркорлар уюшмаси “MUSIAD” билан ҳамкорликда Турк ишбилармон доираларининг Ўзбекистонга ташрифи амалга оширилди.

Ташриф давомида жорий йил 25 февраль куни икки мамлакат бизнес вакиллари иштирокида “Ўзбекистон ва Туркия ўртасида инвестициявий ва савдо-иқтисодий ҳамкорликни янада ривожлантириш ва кенгайтириш истиқболлари” мавзусида “давра суҳбати” ташкил этилди.

Тадбирда Ўзбекистон томонидан Олий Мажлис Сенати аъзолари, Савдо-саноат палатаси, вазирлик ва идоралар ҳамда электротехника, қишлоқ хўжалиги маҳсулотлари, мебель ва қурилиш материалларини ишлаб чиқарувчи компаниялар, оммавий ахборот воситалари вакиллари иштирок этди.

Сўзга чиққанлар 2017 йил октябрь ойида Ўзбекистон Республикаси Президенти Шавкат Миромонович Мирзиёевнинг Туркияга амалга оширган давлат ташрифи, шунингдек, 2018 йил апрель ойида Туркия Президенти Режеп Таййиб Эрдўғоннинг Ўзбекистонга қилган давлат ташрифи ўзбек-турк муносабатлари тарихида янги саҳифа очганини таъкидлаб ўтдилар.

Ушбу ташрифлар доирасида иқтисодиёт, савдо-сотиқ, банк-молия, инвестиция, туризм, транспорт-логистика, соғлиқни сақлаш каби соҳаларда имзоланган ҳужжатлар бугунги кунда икки томонлама муносабатларни сифат жиҳатидан янги поғонага кўтарилгани таъкидланди.

Шу ўринда айтиш жоизки, Ўзбекистонга бўлган давлат ташрифи давомида Ўзбекистон Савдо-саноат палатаси ва “MUSIAD” ташкилоти ўртасида ҳамкорлик битими имзоланган бўлиб, ўтган йилнинг сентябр ойида Тошкент шаҳрида “MUSIAD” нинг ваколатхонаси очилди.

“Давра суҳбати” давомида Турк тадбиркорлари Ўзбекистонда инвестицион муҳитни янада яхшилаш, иқтисодиётни либераллаштириш, тадбиркорларнинг қонуний ҳуқуқ ва манфаатларини ҳимоя қилиш борасида амалга оширилаётган ишлар билан танишдилар.

Томонлар, шунингдек, республикада “зиёрат туризми” салоҳиятини ошириш масалаларини муҳокама қилдилар, қуришиш ва шахарсозлик соҳасидаги ҳамкорлик истиқболларига хам тўхталиб ўтилди ва “Tashkent city” лойиҳасининг тақдимоти ўтказилди. “Давра суҳбати” давомида Ўзбекистон ва Туркия ишбилармон доиралари иштирокида “В2В” форматидаги учрашувлар ташкил этилди.

Делегация аъзоларининг юртимизга ташрифи давом этмоқда, ташриф дастурига кўра делегациянинг туризм салоҳияти билан танишиш мақсадида тарихий шахарлардан Бухоро ва Самаркандга ташрифини амалга ошириш ўрин олган.

Таъкидлаш лозимки, Туркия Ўзбекистонда “зиёрат туризмини” ривожлантиришда фаол иштирок этмоқда, Туркия Буюк миллат мажлиси собиқ депутати Содиқ Бадак 2017 йил ноябрь ойидан Ўзбекистон Туризмни ривожлантириш давлат қўмитаси раисининг маслаҳатчиси сифатида иш бошлаган.

Ўз ССП Ахборот хизмати