ҲАКАМЛИК СУДЛАРИНИНГ ФАОЛИЯТИ ЯКУНЛАРИ МУҲОКАМА ҚИЛИНДИ

2019 йил 3 декабрда Ўзбекистон Республикаси Савдо-саноат палатасида Ҳакамлик судларининг 2019 йилнинг 11 ойи фаолияти якунларига бағишланган видеоселектор ўтказилди.

Видеоселекторда Палата раисининг биринчи ўринбосари И.Жасимов, ҳудудий бошқармалар бошлиқлари, уларнинг ҳуқуқий масалалар бўйича ўринбосарлари, Ҳакамлик судлари раислари, судьялари ва масъул котиблари иштирок этди.

Ҳакамлик судлари томонидан ҳуқуқий тарғибот ишлари ва ҳакамлик муҳокамаси афзалликларини тадбиркорлик субъектларига тушириш бўйича муайян ишлар амалга оширилганлиги натижасида уларга даъво аризалари билан мурожаатлар сони йилдан йилга кўпаймоқда.

Масалан, 2019 йилнинг 11 ойи мобайнида Ҳакамлик судлари томонидан  9 014 та ишлар кўрилган бўлиб, даъво суммаси 236,6 млрд. сўм, 2,9 млн АҚШ долларини ташкил қилган. Бу 2018 йил 11 ойида кўрилган ишлар сонига нисбатан 3 233 тага кўпдир. Айниқса, бу борада ЎзР ССП Кашкадарё (2 629 та иш кўрилган – 2 267 та кўп), Сирдарё (1 272 иш кўрилган  – 880 та кўп), Жиззах (494 иш кўрилган – 407 та кўп), Бухоро (551 иш кўрилган – 211 та кўп) вилоятлари ҳудудий бошқармалари ҳузуридаги Ҳакамлик судлари юқори кўрсаткичларга эришганлар, шунингдек бошқа барча ҳудудий бошқармалар ҳузуридаги Ҳакамлик судлари ҳам ижобий натижага  қайд қилганлар.

Йиғилишда ЎзР ССП Ижроия қўмитасининг Ҳакамлик судлари фаолиятига оид қарорлари ижроси, шу жумладан Ҳакамлик судларига яратилган шароитлар, уларнинг моддий техника базасини мустаҳқамлаш, ахборотларни ўз вақтида ва сифатли тақдим қилиш масалалари,  шунингдек айрим вилоятларда  ҳуқуқий тарғибот ишлари етарли даражада олиб борилмаётганлиги танқидий руҳда муҳокама қилинди.

Ҳудудий бошқарма бошлиқлари ва Ҳакамлик судлари раислари зиммасига Ҳакамлик судларининг фаолияти натижаларини муҳокама қилиш, ҳакамлик муҳокамаси афзалликлари тўғрисида тадбиркорлик субъектларига, ҳокимликларга, хўжалик бошқарув органларига хатлар юбориш; Ҳакамлик судлари моддий-техника таъминотини яхшилашга қаратилган ташкилий тадбирларни амалга ошириш; Ҳакамлик судларига оид ҳуқуқий ҳужжатлар ва ахборотларни бошқарма веб-сайтига жойлаштириш ва унинг тизимли равишда янгилаб бориш каби вазифалар юклатилди.

ССП Ахборот хизмати