Тошкентда Халқаро боғдорчилик кўргазмаси бўлиб ўтади

Ўзбекистон Президенти Ислом Каримов 1 июнь куни "Халқаро боғдорчилик ярмаркасини ҳар йили мунтазам равишда ташкиллаштириш ва ўтказиш чоралари ҳақида"ги фармонини имзолади. 

Фармонга кўра, Халқаро боғдорчилик ярмаркаси 2016 йилнинг 12 июлидан 14 июлига қадар "Ўзэкспомарказ"да ўтказилади. Кўргазма хорижий ҳамкорларни Ўзбекистоннинг мева ва сабзавотлари билан кенг қамровли таништириш мақсадида йўлга қўйилган. 

Ҳужжатда кўргазманинг ҳар йили ўтказилиши таъкидланади. Ўзбекистон раҳбари ташкилий қўмита тузди. Қўмитанинг вазифалари:

- сархил ва қайта ишланган боғдорчилик маҳсулотларини ташқи бозорларга йўналтириш учун самарали механизмни шакллантириш;
- хорижий компанияларни Ўзбекистонда етиштирилаётган экологик тоза мева ва сабзавотлар, узум ҳамда полиз экинларининг салоҳияти ҳақида яқиндан хабардор қилиш;
- дунё бозори ривожланиши тенденциялари ва истиқболлари таҳлили, ҳамкорлар топиш ва улар билан шартномалар тузиш учун қулай шарт-шароитлар яратиш. 

Ярмарка иштирокчиларига кириш визалари консуллик ва бошқа тўловларсиз расмийлаштирилади, ИИВ барча иштирокчиларни бепул турар жойлар билан таъминлайди.