Toshkentda Xalqaro bog‘dorchilik ko‘rgazmasi bo‘lib o‘tadi

O‘zbekiston Prezidenti Islom Karimov 1 iyunь kuni "Xalqaro bog‘dorchilik yarmarkasini har yili muntazam ravishda tashkillashtirish va o‘tkazish choralari haqida"gi farmonini imzoladi. 

Farmonga ko‘ra, Xalqaro bog‘dorchilik yarmarkasi 2016 yilning 12 iyulidan 14 iyuliga qadar "O‘zekspomarkaz"da o‘tkaziladi. Ko‘rgazma xorijiy hamkorlarni O‘zbekistonning meva va sabzavotlari bilan keng qamrovli tanishtirish maqsadida yo‘lga qo‘yilgan. 

Hujjatda ko‘rgazmaning har yili o‘tkazilishi ta’kidlanadi. O‘zbekiston rahbari tashkiliy qo‘mita tuzdi. Qo‘mitaning vazifalari:

- sarxil va qayta ishlangan bog‘dorchilik mahsulotlarini tashqi bozorlarga yo‘naltirish uchun samarali mexanizmni shakllantirish;
- xorijiy kompaniyalarni O‘zbekistonda etishtirilayotgan ekologik toza meva va sabzavotlar, uzum hamda poliz ekinlarining salohiyati haqida yaqindan xabardor qilish;
- dunyo bozori rivojlanishi tendentsiyalari va istiqbollari tahlili, hamkorlar topish va ular bilan shartnomalar tuzish uchun qulay shart-sharoitlar yaratish. 

Yarmarka ishtirokchilariga kirish vizalari konsullik va boshqa to‘lovlarsiz rasmiylashtiriladi, IIV barcha ishtirokchilarni bepul turar joylar bilan ta’minlaydi.