Савдо-саноат палатасида Палата ҳузуридаги ҳуқуқий масалалар бўйича Эксперт кенгаши йиғилиши бўлиб ўтди

Ўзбекистон Республикаси Президенти 2020 йил 24 январдаги Олий Мажлисга қилган Мурожаатномасида тадбиркорлик соҳасидаги лицензия ва рухсатномаларни камида 2 баробарга қисқартириш лозимлигини таъкидлаб ўтди. Ушбу масала юзасидан тадбиркорлик субъектлари фикрларини аниқлаш мақсадида жорий йилнинг 2 март куни Савдо-саноат палатасида Палата ҳузуридаги ҳуқуқий масалалар бўйича Эксперт кенгаши йиғилиши бўлиб ўтди.

Йиғилиш видеоконференция шаклида бўлиб ўтди ҳамда унда 200 дан ортиқ тадбиркорлик субъектлари иштирок этди.

Йиғилишда нодавлат таълим, савдо ва умумий овқатланиш соҳасида фаолият юритувчи тадбиркорлар мазкур соҳаларда мавжуд бўлган лицензия ва рухсатномаларни қисқартириш, уларни бериш жараёнини соддалаштириш юзасидан ўз фикр-мулоҳазаларини ҳамда бир қатор таклифларни билдиришди. Хусусан, нодавлат таълим соҳасида фаолият юритаетган айрим тадбиркорлар ушбу фаолият учун лицензия шарт эмас деган фикрни билдирган бўлсалар, шу соҳанинг бошқа вакиллари эса лицензиялаш шарт деган фикрни билдиришди. Шунингдек, баъзи тадбиркорлар нодавлат таълим фаолиятининг айрим йўналишлари, хусусан давлат наъмунасида ҳужжат бермайдиган нодавлат таълим ташкилотлари учун лицензияни бекор қилиш бўйича таклифларни билдириб ўтишди.

Бундан ташқари, савдо ва умумий овқатланиш соҳасида фаолият юритувчи тадбиркорлар томонидан мазкур йўналишларда алкоголь маҳсулотларини реализация қилиш учун лозим бўлган лицензия ва рухсатномаларни бекор қилиш таклиф этилди. Шунингдек, тадбиркорлар томонидан мазкур соҳаларда тегишли рухсат бериш хусусиятига эга ҳужжатларни олиш мураккаблиги, муддатларнинг чўзиб юборилаётганлиг таъкидланди.

Йиғилиш якунида Савдо-саноат палатаси Раисининг биринчи ўринбосари И.Жасимов тадбиркорларнинг таклиф ва мулоҳазалари йиғилиш Байонига киритилишини ҳамда тегишли ташкилотларга юборилишини маълум қилди.

ССП Ахборот хизмати