Savdo-sanoat palatasida Palata huzuridagi huquqiy masalalar bo‘yicha Ekspert kengashi yig‘ilishi bo‘lib o‘tdi

O‘zbekiston Respublikasi Prezidenti 2020 yil 24 yanvardagi Oliy Majlisga qilgan Murojaatnomasida tadbirkorlik sohasidagi litsenziya va ruxsatnomalarni kamida 2 barobarga qisqartirish lozimligini ta'kidlab o‘tdi. Ushbu masala yuzasidan tadbirkorlik subyektlari fikrlarini aniqlash maqsadida joriy yilning 2 mart kuni Savdo-sanoat palatasida Palata huzuridagi huquqiy masalalar bo‘yicha Ekspert kengashi yig‘ilishi bo‘lib o‘tdi.

Yig‘ilish videokonferensiya shaklida bo‘lib o‘tdi hamda unda 200 dan ortiq tadbirkorlik subyektlari ishtirok etdi.

Yig‘ilishda nodavlat ta'lim, savdo va umumiy ovqatlanish sohasida faoliyat yurituvchi tadbirkorlar mazkur sohalarda mavjud bo‘lgan litsenziya va ruxsatnomalarni qisqartirish, ularni berish jarayonini soddalashtirish yuzasidan o‘z fikr-mulohazalarini hamda bir qator takliflarni bildirishdi. Xususan, nodavlat ta'lim sohasida faoliyat yuritayotgan ayrim tadbirkorlar ushbu faoliyat uchun litsenziya shart emas degan fikrni bildirgan bo‘lsalar, shu sohaning boshqa vakillari esa litsenziyalash shart degan fikrni bildirishdi. Shuningdek, ba'zi tadbirkorlar nodavlat ta'lim faoliyatining ayrim yo‘nalishlari, xususan davlat na'munasida hujjat bermaydigan nodavlat ta'lim tashkilotlari uchun litsenziyani bekor qilish bo‘yicha takliflarni bildirib o‘tishdi.

Bundan tashqari, savdo va umumiy ovqatlanish sohasida faoliyat yurituvchi tadbirkorlar tomonidan mazkur yo‘nalishlarda alkogol mahsulotlarini realizatsiya qilish uchun lozim bo‘lgan litsenziya va ruxsatnomalarni bekor qilish taklif etildi. Shuningdek, tadbirkorlar tomonidan mazkur sohalarda tegishli ruxsat berish xususiyatiga ega hujjatlarni olish murakkabligi, muddatlarning cho‘zib yuborilayotganligi ta'kidlandi.

Yig‘ilish yakunida Savdo-sanoat palatasi Raisining birinchi o‘rinbosari I.Jasimov tadbirkorlarning taklif va mulohazalari yig‘ilish Bayoniga kiritilishini hamda tegishli tashkilotlarga yuborilishini ma'lum qildi.

SSP Axborot xizmati