Савдо-саноат палатасида “Лицензия ва рухсатномаларни 2 баробарга қисқартириш” мавзусида Эксперт кенгашининг йиғилиши бўлиб ўтди

Ўзбекистон Республикаси Президенти 2020 йил 24 январдаги Олий Мажлисга қилган Мурожаатномасида тадбиркорлик соҳасидаги лицензия ва рухсатномаларни камида 2 баробарга қисқартириш лозимлигини таъкидлаб ўтди. Ушбу масала юзасидан тадбиркорлик субъектлари фикрларини аниқлаш мақсадида жорий йилнинг 9 март куни Савдо-саноат палатасида Палата ҳузуридаги ҳуқуқий масалалар бўйича Эксперт кенгашининг навбатдаги йиғилиши бўлиб ўтди.

Йиғилиш видеоконференция шаклида бўлиб, унда 200 га яқин тадбиркорлик субъектлари иштирок этди.

Йиғилишда соғлиқни сақлаш, фармацевтика ҳамда ветеринария соҳаларида фаолият юритувчи тадбиркорлар мазкур соҳаларда мавжуд бўлган лицензия ва рухсатномаларни қисқартириш, уларни бериш жараёнини соддалаштириш юзасидан ўз фикр-мулоҳазаларини ҳамда бир қатор таклифларни билдиришди.

Хусусан, соғлиқни сақлаш соҳасида фаолият юритаетган айрим тадбиркорлар ушбу фаолият учун лицензия шарт деган фикрни билдирган бўлсалар, шу соҳанинг бошқа вакиллари эса айрим лицензия талабларини соддалаштириш лозим деган фикрни билдиришди. Шунингдек, фармацевтика соҳасидаги айрим лицензия турларини бирлаштириш, айримлари бўйича эса лицензия талабларини соддалаштириш, шунингдек баъзи лицензия турларини қолдириш бўйича таклифлар билдириб ўтилди.

Бундан ташқари, ветеринария соҳасида фаолият юритувчи тадбиркорлар томонидан мазкур йўналишда баъзи лицензия турлари зарурлиги, баъзиларини бекор қилиш лозимлиги, шунингдек айрим лицензия талабларини соддалаштириш лозимлиги таъкидланди.

Йиғилиш якунида Савдо-саноат палатаси Раисининг биринчи ўринбосари И.Жасимов тадбиркорларнинг таклиф ва мулоҳазалари йиғилиш Баёнига киритилишини ҳамда тегишли ташкилотларга юборилишини маълум қилди

ССП Ахборот-хизмати