Ўзбекистон-Италия бизнес-форуми ташкил этилди

2020 йил 2-июль куни Ўзбекистон Республикаси Савдо-саноат палатаси Ўзбекистон Республикасининг  Италиядаги элчихонаси ва Италия-Ўзбекистон савдо палатаси ("ITALUZ") билан ҳамкорликда видеоконференция шаклида қишлоқ хўжалиги соҳасига оид Ўзбекистон-Италия бизнес-форумини ташкил этди.

Ушбу видеоконферециядан кўзланган мақсад: экспортга йўналтирилган қишлоқ хўжалиги маҳсулотларини ишлаб чиқаришни ривожлантириш, шунингдек, Ўзбекистон ва Италия ўртасидаги савдо-иқтисодий, сармоявий ва минтақавий ҳамкорликни ривожлантириш.

Тадбирда Ўзбекистон Республикаси Савдо-саноат палатаси раиси Адҳам Икрамов, Италия-Ўзбекистон савдо палатаси Президенти Луиджи Иперти, Ўзбекистоннинг Италия Республикасидаги Фавқулотда ва Мухтор элчиси Отабек Акбаров, шунингдек, икки мамлакатнинг агросаноат соҳасидаги ишбилармон доира вакиллари иштирок этди.

Ўзбекистон Савдо-саноат палатаси раиси А. Икрамов ўз нутқида, сўнгги йилларда икки мамлакат ишбилармон доиралари ўртасидаги савдо-иқтисодий ҳамкорлик фаоллашганини, ташкил этилган қўшма тадбирлар бунинг тасдиқи эканлигини таъкидлади.

Ўз навбатида жаноб Луиджи Иперти Ўзбекистон Савдо-саноат палатасига Италиядаги ҳамкор ташкилотлар билан қўшма лойиҳаларни амалга оширишда фаол иштирок ва ўзаро ҳамкорлик учун миннатдорчилик билдирди.

Онлайн тарзда бўлиб ўтган конференцияда мева-сабзавот, чорва молларини етиштириш, шунингдек, Ўзбекистонда мева ва сабзавотларни йиғиш, саралаш, қайта ишлаш, совутиш тизимлари қолверса Италиянинг қишлоқ хўжалиги техникаларини етказиб бериш борасидаги ҳамкорликни кенгайтириш масалалари муҳокама қилиниб, мазкур йўналишларда инвестиция лойиҳаларини амалга ошириш масаласи ҳам кўриб чиқилди.

Видеоконференцияда Италия компаниялари вакиллари соҳага оид тақдимотлари билан  иштирокчиларни таништириб ўтишди.

Форумда Ўзбекистон Республикаси Қишлоқ хўжалиги вазирлиги бош бошқармаси бошлиғи Рамин Ҳасанов, “Ўзбекозиковкатхолдинг” компанияси раисининг ўринбосари Баходир Юнусов ва “BMB Trade Group” бош директорининг маслаҳатчиси Баходир Комилов сўзга чиқдилар.

Икки мамлакат вакиллари ўртасидаги ушбу видеоконфереция доирасида Ўзбекистон-Италия савдо-иқтисодий алоқаларини янада ривожлантириш ва ушбу соҳада ўзаро манфаатли ҳамкорликни ривожлантиришнинг истиқболлари муҳокама қилинди. Шунингдек, қишлоқ хўжалиги соҳасида фаолият юритувчи Ўзбекистон ва Италия компаниялари ўртасидаги шериклик алоқаларини кенгайтириш юзасидан фикр алмашилди.

Очиқ мулоқот, истиқболли лойиҳалар ва келишувлар борасида янада чуқурроқ ҳамкорлик қилиш, ўзаро манфаатли йўналишларни аниқ белгилаш қолаверса, Ўзбекистон ва Италия ишбилармон доиралари ўртасидаги ўзаро муносабатларнинг самарали ташкил этиш имконини берди.

Маълумот учун: Эслатиб ўтамиз, 2019 йил 21 ноябрда Ломбардия вилояти губернатори А. Фонтан бошчилигидаги делегация Ўзбекистонга ташриф буюрган эди. Ушбу ташриф доирасида B2B форматидаги кооперацион биржа ва Ўзбекистон-Италия бизнес-форуми ташкил этилган.

2019 йил якунларига кўра мамлакатлар ўртасидаги товар айирбошлаш 402,3 миллион АҚШ долларини ташкил этди (2018 йилга нисбатан (303,2 миллион), ўсиш 32 фоизга), бунда экспорт 26,6 миллион долларни, импорт  375,7 миллион доллар ташкил этган.

Ўзбекистонда Италия сармояси иштирокидаги 50 та корхона фаолият кўрсатмоқда, улардан 14 таси 100% италия капитали асосида ишлайди.

ССП Матбуот хизмати