Тадбиркорликни ривожлантириш бўйича кўрилаётган чораларнинг асосий натижалари ва бу борадаги муҳим вазифалар буйича Савдо-саноат палатаси раиси ўринбосари Қашқадарё вилоятида учрашув ўтказди.

Қашқадарё вилояти ҳокимлигида «Тадбиркорликни ривожлантириш бўйича кўрилаётган чораларнинг асосий натижалари ва бу борадаги муҳим вазифалар» бўйича Қашқадарё вилояти ҳокимининг биринчи ўринбосари Уткир Бутаев, Ўзбекистон Савдо-саноат палатаси раиси ўринбосари Фарходжон Тошпўлатов шаҳар(туман) ҳоким ўринбосарлари, банк ходимлари ва ОАВ вакиллари билан учрашув ташкил этилди.

Учрашувни Қашқадарё вилояти ҳокимининг биринчи ўринбосари Ў.Бутаев очиб берди.

Ўткир Бутаев ўз нутқида вилоят меҳмонларига Қашқадарёнинг салоҳияти, ишлаб чиқариш қуввати ва туризм соҳаларининг ривожи ҳақида хамда вилоятда тадбиркорлик соҳасини янада ривожлантириш борасида амалга оширилаётган ишлар тўғрисида маълумот берди.

Маълумки, коронавирус пандемияси даврида тадбиркорлар, шу жумладан ҳунармандчилик субъектларини имкон қадар ҳар томонлама қўллаб-қувватлаш, шунингдек улар фаолиятига пандемиянинг таъсирини юмшатиш бўйича бир қатор чоралар кўриб келинмоқда.

"Хабарларингиз бор, Давлатимиз раҳбари томонидан карантин талабларига қатъий риоя қилган ҳолда иқтисодиёт тармоқлаир, шу жумладан тадбиркорлик субъектларининг узлуксиз фаолият юритишини таъминлаш, шунингдек фаолиятини вақтинча тўхтатган корхоналар фаолиятини тўлиқ тиклаш бўйича муҳим вазифалар белгилаб берилган", дейди вилоят ҳокимининг иқтисодиёт ва тадбиркорлик масалалари бўйича биринчи ўринбосари Бутаев Ўткир Умирович.

Қашқадарё вилоятининг туман (шаҳар)лари кесимида кўриб чиқадиган бўлсак, ҳолат қуйидагича: Аҳолини тадбиркорликка ўргатиш ва бизнесга кенг жалб этиш бўйича Қашқадарё вилояти ҳокимлиги томонидан мавжуд имконият ва резервлар ҳисобига 2020 йилда 6,2 мингта янги кичик бизнес субъектлари ташкил этиш белгилаб олинган. Таъкидлаш керакки, пандемия бўлишига қарамасдан бўш ер ва бинолар савдоси ташкил этилаётганлиги, шунингдек дастурлар бўйича кредитлаш узлуксиз давом этаётганлиги ва пандемия даври учун ҳам алоҳида eнгилликлар яратилаётганлиги туфайли янги корхоналар ташкил этилиши тўхтаб қолгани йўқ. Хусусан, жорий йил январь-август ойларида 3 339 та субъект ташкил этилган (прогноз ижроси 74%). Шунингдек, улардан 439 таси оилавий корхона сифатида рўйхатдан ўтган.

Қашқадарё вилоятида ҳунармандчиликни ривожлантириш бўйича ҳам ички имкониятлар кенг. Ўтган давр мобайнида вилоятда ҳунармандчиликни ривожлантириш бўйича муайян ишлар амалга оширилди ва қатор ижобий натижаларга эришилди. Жумладан: Уста ҳунармандлар сони 2 992 тага этди, шундан 1 029 таси жорий йилда шаклланди. Шогирдлар сони 3 976 тага этди, шундан 1 404 таси жорий йилда шаклланди. Яратилган иш ўринлари сони 6 928 тага этди, шундан 2 433 таси жорий йилда яратилди. Жорий йилда қўшимча ажратилган 50 млн. АҚШ долларини 2020 йил якунига қадар ўзлаштириш бўйича 23,9 млрд сўмлик (шундан,банк кредити 19,9 млрд.) 452 та ҳунармандчилик лойиҳалари дастури тасдиқланган деб таъкидлаб ўтди ҳоким ўринбосари.

Хоким ўринбосарининг нутқидан сўнг Ўзбекистон Республикаси Савдо-саноат палатаси Раиси ўринбосари Тошпўлатов Фарходжон Муродович ҳам сўзга чиқиб Қашқадарёнинг тадбиркорлик салоҳияти ва имкониятларини шу жумладан камчиликларини ҳам санаб ўтдилар.

Ф.Тошпўлатов ўз нутқида Қарши шаҳридаги «Одина» мажмуаси ҳақида сўз юритиб, у ердаги ўзгаришлар ҳақида фикр мулоҳаза билдирдилар. Каштачилик, гиламдўзлик, кулолчилик, миниатюра йўналишидаги намунавий ҳунармандлар устахонасини барпо этилиши, ушбу йўналишда шогирдлар сонини оширишга кўмак берибгина қолмай, ҳунармандларга берилаётган яна бир имконият эканлигини таъкидлаб ўтди.

Фарходжон Тошпўлатов туман ҳокимлари ўринбосарлари билан ҳудуддаги тадбиркорлик субъектларини тугатиш эмас, уларни қайта тиклаш борасида самарали ишлар олиб бориш масаласини ҳам мухокама этди.

Барча ҳудудлар учун бир хил имконият яратилган, шу боис Солиқ ва Бандлик органлари тадбиркорлар сонини кўпайтириш жараёнида ҳар бир кичик бизнес субъекти ҳисобига яратиладиган янги иш ўринлари сонини 3.5 – 3.7 бирликка етказиши лозимлигни таъкидлади Ўзбекистон Савдо-саноат палатаси раиси ўринбосари Фарходжон Тошпўлатов.

Тадбир давомида соҳа мутахассислари сўзга чиқиб вилоятда саноат корхоналари биринчи ярим йиллик фаолият таҳлиллари,камбағалликни қисқартириш бўйича амалга оширилаётган ишлар ва «Темир дафтар»га киритилган оилаларга кўмак бериш борасида қилинаётган ишлар ҳақида тақдимот орқали тушунтириш бериб ўтдилар. ОАВ вакиллари ҳам қатнашиб ўзларини қизиқтирган саволларга жавоб олдилар.

ССП Ахборот хизмати