Жамоатчилик экспертизаси хулосаси

Ўзбекистон Республикаси Монополияга қарши курашиш қўмитаси томонидан ишлаб чиқилган “Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикаси Қонуни (ID-21094) лойиҳаси  жамоатчилик экспертизасидан  ўтказилиб, у юзасидан қуйидагича Жамоатчилик экспертизаси хулосаси берилди:

Лойиҳа билан Ўзбекистон Республикасининг айрим қонун ҳужжатларига маҳаллий кўпикланадиган ва табиий вино рекламасига маълум талабларни инобатга олган ҳолда рухсат берилишини назарда тутувчи ўзгартириш ва қўшимчалар киритиш белгиланган.

Ўзбекистон Республикаси Президентининг 2019 йил 5 февралдаги
ПФ-5656-сонли Фармонида кўпикланадиган ва табиий виноларга берилган енгилликлар маҳаллий пиво маҳсулотларига нисбатан ҳам қўланилиши назарда тутилган.

Бироқ, лойиҳада реклама соҳасида фақат кўпикланадиган ва табиий виноларгагина енгилликлар бериш белгиланган бўлиб, маҳаллий пиво маҳсулотлари келтирилмаган.

Ваҳолангки, пиво қолган алкоголь маҳсулотларига нисбатан таркибида этил спирти миқдори энг паст бўлган маҳсулот ҳисобланади (кўпи билан 8%). Ҳатто, табиий вино таркибида ҳам этил спирти миқдори 8,5-15%, яъни пиводан юқорироқдир.

Шу боис ҳамда тадбиркорлар томонидан билдирилган таклифларни инобатга олган ҳолда, лойиҳада реклама соҳасида кўпикланадиган ва табиий виноларга берилган енгилликларни маҳаллий пиво маҳсулотларига ҳам берилишини назарда тутиш мақсадга мувофиқдир.

ССП Ахборот-хизмати