Янгиерда ёшлар билан ишлашнинг намунавий тизими йўлга қўйилади

Ўзбекистон Республикаси Президенти Ш.Мирзиёев раислигида жорий йилнинг 8 октябрь куни жамиятда аёллар ва ёшларнинг ролини ошириш ҳамда бандлигини таъминлаш юзасидан видеоселектор йиғилишида ёшлар билан ишлашнинг янгича тизимини яратиш белгиланган бўлиб, унга асосан ҳудудларда муваффақиятга эришган, ўз соҳасининг етук вакили бўлган тадбиркорлик субъектлари билан ёшларнинг учрашувини ташкил қилиш назарда тутилган эди.

Хусусан, Сирдарё вилоятининг Янгиер шаҳри ва Ховос тумани ёшлар дафтарига киритилган аҳоли билан ҳудудда муваффақиятли тадбиркорлик субъектлари учрашувини ташкил қилиш режалаштирилган.

Бу борадаги вазифаларнинг ижросини тўлақонли ва сифатли амалга ошириш мақсадида, Савдо-саноат палатаси, Ёшлар ишлари агентлиги, Олий ва ўрта махсус таълим вазирлиги ҳамда “Ҳунарманд” уюшмаси ўртасида ҳамкорликдаги қўшма чора-тадбирлар дастурига асосан жорий йилнинг 14 ноябрь куни Янгиер шаҳрида мазкур учрашув ташкиллаштирилди.

 Учрашувда ёшлар ва хотин-қизларни меҳнат бозорида талаб юқори касб-ҳунарларга тайёрлашни тизимли йўлга қўйиш, уларни тадбиркорлик ва ҳунармандчиликка фаол жалб қилиш, муносиб иш топишига кўмаклашиш масалалари муҳокама қилинди.

Тадбирда Ўзбекистон Республикаси Президентининг 2020 йил 13 октябрдаги ПҚ-4862-сонли қарори, ушбу қарор билан ёшлар ва хотин-қизларга ажратилиши белгиланган имтиёзли кредитлар бўйича тушунчалар берилди ва ёшлар ўз қизиқишларига қараб тадбиркорлик, ҳунармандчилик, IT технологиялар фойдаланиш, стартап лойиҳаларини амалга ошириш каби гуруҳларга ажратилиб соҳада юқори натижаларга эришган мутахассислар томонидан “Муваффақиятга эришиш сирлари” лойиҳаси бўйича мастер класслар ташкил қилинди.

Вилоятнинг Ховос туманидаги учрашув жорий йилнинг 1 декабрь куни Ховос туманидаги 1-сонли касб-ҳунар мактабида бўлиб ўтиши, шунингдек, республиканинг барча ҳудудларида 2021 йил давомида ушбу лойиҳа амалга оширилиши белгиланган.

ССП Ахборот-хизмати