Yangierda yoshlar bilan ishlashning namunaviy tizimi yo‘lga qo‘yiladi

O‘zbekiston Respublikasi Prezidenti Sh.Mirziyoev raisligida joriy yilning 8 oktyabr' kuni jamiyatda ayollar va yoshlarning rolini oshirish hamda bandligini ta'minlash yuzasidan videoselektor yig‘ilishida yoshlar bilan ishlashning yangicha tizimini yaratish belgilangan bo‘lib, unga asosan hududlarda muvaffaqiyatga erishgan, o‘z sohasining yetuk vakili bo‘lgan tadbirkorlik sub'ektlari bilan yoshlarning uchrashuvini tashkil qilish nazarda tutilgan edi.

Xususan, Sirdaryo viloyatining Yangier shahri va Xovos tumani yoshlar daftariga kiritilgan aholi bilan hududda muvaffaqiyatli tadbirkorlik sub'ektlari uchrashuvini tashkil qilish rejalashtirilgan.

Bu boradagi vazifalarning ijrosini to‘laqonli va sifatli amalga oshirish maqsadida, Savdo-sanoat palatasi, Yoshlar ishlari agentligi, Oliy va o‘rta maxsus ta'lim vazirligi hamda “Hunarmand” uyushmasi o‘rtasida hamkorlikdagi qo‘shma chora-tadbirlar dasturiga asosan joriy yilning 14 noyabr' kuni Yangier shahrida mazkur uchrashuv tashkillashtirildi.

 Uchrashuvda yoshlar va xotin-qizlarni mehnat bozorida talab yuqori kasb-hunarlarga tayyorlashni tizimli yo‘lga qo‘yish, ularni tadbirkorlik va hunarmandchilikka faol jalb qilish, munosib ish topishiga ko‘maklashish masalalari muhokama qilindi.

Tadbirda O‘zbekiston Respublikasi Prezidentining 2020 yil 13 oktyabrdagi PQ-4862-sonli qarori, ushbu qaror bilan yoshlar va xotin-qizlarga ajratilishi belgilangan imtiyozli kreditlar bo‘yicha tushunchalar berildi va yoshlar o‘z qiziqishlariga qarab tadbirkorlik, hunarmandchilik, IT texnologiyalar foydalanish, startap loyihalarini amalga oshirish kabi guruhlarga ajratilib sohada yuqori natijalarga erishgan mutaxassislar tomonidan “Muvaffaqiyatga erishish sirlari” loyihasi bo‘yicha master klasslar tashkil qilindi.

Viloyatning Xovos tumanidagi uchrashuv joriy yilning 1 dekabr' kuni Xovos tumanidagi 1-sonli kasb-hunar maktabida bo‘lib o‘tishi, shuningdek, respublikaning barcha hududlarida 2021 yil davomida ushbu loyiha amalga oshirilishi belgilangan.

SSP Axborot-xizmati