Жамоатчилик экспертизаси ўтказилган яна бир норматив-ҳуқуқий ҳужжат лойиҳаси хусусида

“Ўзбекистон Республикаси Савдо-саноат палатаси тўғрисида”ги Қонуннинг 22-моддасида белгиланган Савдо-саноат палатасининг қонун ижодкорлиги соҳасидаги ваколатларини амалга оширган ҳолда, Палата томонидан қонунчилик ҳужжатлари лойиҳалари юзасидан Жамоатчилик экспертизалари ўтказилиб, уларнинг тадбиркорлик фаолиятига таъсирини баҳолаган ҳолда, салбий ҳамда ижобий характердаги Хулосалар бериб келинмоқда.

Хусусан, жорий йилнинг ўтган даври мобайнида 75 та норматив-ҳуқуқий ҳужжат лойиҳаси Палата томонидан кўриб чиқилиб, Жамоатчилик экспертизаси хулосалари берилди.

Мисол учун, Ўзбекистон Республикаси Энергетика вазирлиги томонидан ишлаб чиқилган Ўзбекистон Республикаси Вазирлар Маҳкамасининг “Ёқилғи-энергия ресурсларидан янада самарали ва оқилона фойдаланиш чора-тадбирлари тўғрисида”ги Қарори (ID-26429) лойиҳаси  жамоатчилик экспертизасидан  ўтказилиб, у юзасидан қуйидагича Жамоатчилик экспертизаси хулосаси берилди:

Лойиҳанинг 2-бандига кўра, “Белгилансинки, мазкур қарор кучга киргандан 2025 йил 1 январга қадар республика ҳудудларида тадбиркорлик субъектлари томонидан автомобилларга газ тўлдириш компрессор шахобчалари ҳамда табиий газдан фойдаланган ҳолда қурилиш материаллари, жумладан пишган ғишт, оҳак ва гипс ишлаб чиқариш корхоналари ҳамда иссиқхона хўжаликлари қурилишига ер участкаларини ажратилишига мораторий эълон қилинади”.

Таъкидлаш лозимки, ушбу банд билан 2025 йил 1 январга қадар автомобилларга газ тўлдириш компрессор шахобчалари ҳамда табиий газдан фойдаланган ҳолда қурилиш материаллари, жумладан пишган ғишт, оҳак ва гипс ишлаб чиқариш корхоналари ҳамда иссиқхона хўжаликлари қурилишига ер участкаларини ажратмаслик таклиф этилмоқда.

Мазкур норма етказиб бериладиган табиий газ ресурсларини чекланганлиги ҳамда аҳоли хонадонлари, ижтимоий соҳа объектлари ва иссиқлик таъминоти корхоналарига табиий газни барқарор етказиб беришни таъминлаш билан асослантирилган.

Бироқ, шуни инобатга олиш жоизки, таклиф этилаётган норма табиий газ етказиб беришдаги муаммоларга ечим бўла олмайди, аксинча ишбилармонлик муҳитининг кескин ёмонлашишига сабаб бўлади.

Шунингдек, ҳозирги кунда, аҳоли сони ошиб бораётган бир вақтда бу каби норманинг белгиланиши аҳолини иш билан таъминлашда ҳам бир қатор муаммоларни келтириб чиқариши мумкин. Чунки, айнан тадбиркорлик субъектлари аҳолини иш билан таъминлашда асосий рол ўйнайди.

Кўриниб турибдики, юқоридаги норма билан муаммога фақат бир томонлама ечим топишга ҳаракат қилинган. Бунда мазкур тартиб оқибатида келиб чиқадиган бошқа муаммолар таҳлил қилинмаган.

Хусусан, таклиф этилаётган тартиб амалда автотранспорт воситалари ёқилғиси, қурилиш материаллари ҳамда озиқ-овқат маҳсулотлари нархлари ошиб кетишига, озиқ-овқат маҳсулотлари танқислигига, шунингдек қишлоқ хўжалиги ва қурилиш материаллари экспортининг пасайиб кетишига олиб келади.

Бундан ташқари, тадбиркорлик фаолияти учун ер ажратиш масалалари Ер кодекси ҳамда Президент фармон ва қарорлари билан белгиланган бир ҳолда, юридик жиҳатдан қуйи турувчи Вазирлар Маҳкамаси қарори билан бундай чекловнинг жорий этилиши мазмунан Ҳукумат қарорининг юқори турувчи бошқа норматив-ҳуқуқий ҳужжатларга зид келиб қолишига сабаб бўлади.

Умуман олганда, мазкур норма ҳозирги кунда Президентимиз ташаббуси билан олиб борилаётган тадбиркорлик субъектлари сонини ошириш бўйича ислоҳотларга мазмунан зид келади.

Шу билан бирга, таъкидлаш жоизки, юқоридаги муаммони ер беришни чеклаш билан эмас, балки табиий газ қазиб олишни ва импорт қилишни шунингдек, алтернатив энергия манбаларидан фойдаланишни кўпайтириш орқали ҳал этиш тўғри бўлар эди.

Юқоридагилардан келиб чиқиб, лойиҳа 2-бандини чиқариб ташлаш лозим.

ССП Матбуот хизмати