“Ҳалол” стандартини жорий этиш ва унга қўйиладиган талаблар бўйича онлайн муҳокама бўлиб ўтди

2021 йил 17 февраль куни Ўзбекистон Савдо-саноат палатаси ва “Ўзстандарт” агентлиги билан “Ҳалол” стандартини экспортёр корхоналар орасида жорий этиш ва унга қўйиладиган талаблар муҳокамасига бағишланган видеомулоқот бўлиб ўтди.

Мазкур тадбирда “Ҳалол” стандартини амалиётга жорий этишнинг афзалликлари, ҳамда экспортёр корхоналарига, шу жумладан озиқ-овқат маҳсулотларини экспорт қилувчи корхоналар мазкур стандартни қабул қилиш орқали сертификатлаштириш жараёнларида белгиланган меъёрларга таяниш зарурлиги тўғрисида айтиб ўтилди.

Маълумки, “Ҳалол” белгиси остида сертификатлаштириладиган маҳсулотлар гуруҳига пардоз-андоз ва шахсий гигиена истеъмол моллари; жониворларнинг гўшти, ёғи ва бошқа хомашёси асосида тайёрланадиган озиқ-маҳсулотлар; сайёҳларга “ҳалол” хизматлари кўрсатувчи объектлари киради.

Шунингдек ушбу стандартнинг жорий этилиши маҳаллий тадбиркорлик субъектларига  хорижий бозорларга маҳсулотларнинг экспорт қилинишида кенг йўл очиб бериши ва унинг ҳажмини ошиши ҳамда янги экспорт бозорларига кириш учун шарт-шароит яратиши ҳақида этиб ўтилди.

Тадбир якунида Ўзбекистон Савдо-саноат палатаси ва “Ўзстандарт” агентлиги билан ҳамкорликда “Ҳалол” стандарти бўйича маҳаллий тадбиркорлик субъектлари учун онлайн вебинар ташкил ҳамда уни амалиётига жорий этиш бўйича келишиб олинди.

ССП Матбуот хизмати