Фарғона вилоятида Ўзбекистон-Қирғизистон бизнес-форуми бўлиб ўтди

Фарғона ва Қирғизистоннинг Норин вилоятлари ишбилармон доиралари иштирокидаги бизнес-форум бўлиб ўтди. 

Бизнес-форумни Вилоят ҳокими Хайрулло Бозоров ва Норин вилояти губернатори Собирқул Ашимбаев очиб беришди.

Норин вилояти администрацияси инвестицион-иқтисодий комплекси раҳбари Эльмира Турганбаева вилоятининг иқтисодий салоҳияти ҳамда туманлар бўйича ҳамкорлик истиқболлари юзасидан тақдимот ўтказди. “Норин” эркин иқтисодий зонаси бош директори Гулзат Абрасулова ЭИЗ ҳақида маълумот бериб, инвесторлар ва тадбиркорлар учун яратилган шарт-шароитлар ва имтиёзлар борасида батафсил ахборот тақдим этди. Норин вилояти туризм идораси вакили Гулира Кенжекариеванинг тақдимоти эса вилоятнинг туризм салоҳияти ҳамда туризмнинг ривожланаётган алоҳида турларига бағишланди.

Фарғона шаҳридаги “Сайқал” масъулияти чекланган жамияти раҳбари Абдураҳмон Ниёзов, “Uz-Segan” корхонаси бош директори Хуршид Норматов ҳамда «Баҳодир Лоғон» қишлоқ хўжалик ва тўқимачилик кластери Мўминжон Йўлдошев Норин вилоятида ўзаро ҳамкорликда амалга оширишда истиқболли бўлган йўналишлар юзасидан ўз мулоҳаза ва таклифларини билдирдилар.

Бизнес-форум давомида Марғилон ва Норин шаҳарлари, Қувасой шаҳри ва Ак-талаа тумани, Тошлоқ ва Жумгал, Қува ва Норин, Олтиариқ ва Қочкор туманлари ўртасида савдо-иқтисодий ҳамда инвестицион соҳаларда ўзаро ҳамкорликни йўлга қўйиш юзасидан меморандум имзоланди. «Баҳодир Лоғон» кластери ҳамда Атбаши туманлари ўртасида эса қишлоқ хўжалиги ва чорвачилик соҳасида кўп томонлама ҳамкорликни кўзда тутган шартнома имзоланди.

Форум, Фарғона ва Норин вилоятлари ишбилармон доираларининг B2B ҳамда B2G форматидаги учрашувлари билан давом этди.

ССП Ахборот-хизмати