Farg‘ona viloyatida O‘zbekiston-Qirg‘iziston biznes-forumi bo‘lib o‘tdi

Farg‘ona va Qirg‘izistonning Norin viloyatlari ishbilarmon doiralari ishtirokidagi biznes-forum bo‘lib o‘tdi.

Biznes-forumni Viloyat hokimi Xayrullo Bozorov va Norin viloyati gubernatori Sobirqul Ashimbaev ochib berishdi.

Norin viloyati administratsiyasi investision-iqtisodiy kompleksi rahbari El'mira Turganbaeva viloyatining iqtisodiy salohiyati hamda tumanlar bo‘yicha hamkorlik istiqbollari yuzasidan taqdimot o‘tkazdi. “Norin” erkin iqtisodiy zonasi bosh direktori Gulzat Abrasulova EIZ haqida ma'lumot berib, investorlar va tadbirkorlar uchun yaratilgan shart-sharoitlar va imtiyozlar borasida batafsil axborot taqdim etdi. Norin viloyati turizm idorasi vakili Gulira Kenjekarievaning taqdimoti esa viloyatning turizm salohiyati hamda turizmning rivojlanayotgan alohida turlariga bag‘ishlandi.

Farg‘ona shahridagi “Sayqal” mas'uliyati cheklangan jamiyati rahbari Abdurahmon Niyozov, “Uz-Segan” korxonasi bosh direktori Xurshid Normatov hamda «Bahodir Log‘on» qishloq xo‘jalik va to‘qimachilik klasteri Mo‘minjon Yo‘ldoshev Norin viloyatida o‘zaro hamkorlikda amalga oshirishda istiqbolli bo‘lgan yo‘nalishlar yuzasidan o‘z mulohaza va takliflarini bildirdilar.

Biznes-forum davomida Marg‘ilon va Norin shaharlari, Quvasoy shahri va Ak-talaa tumani, Toshloq va Jumgal, Quva va Norin, Oltiariq va Qochkor tumanlari o‘rtasida savdo-iqtisodiy hamda investision sohalarda o‘zaro hamkorlikni yo‘lga qo‘yish yuzasidan memorandum imzolandi. «Bahodir Log‘on» klasteri hamda Atbashi tumanlari o‘rtasida esa qishloq xo‘jaligi va chorvachilik sohasida ko‘p tomonlama hamkorlikni ko‘zda tutgan shartnoma imzolandi.

Forum, Farg‘ona va Norin viloyatlari ishbilarmon doiralarining B2B hamda B2G formatidagi uchrashuvlari bilan davom etdi.

SSP Axborot-xizmati