“Халқаро кулолчилик фестивали” ўтказилади.

Ўзбекистон Республикаси Президентининг 2021 йил 23 март куни “Кулолчиликни жадал ривожлантириш ва қўллаб-қувватлаш чора-тадбирлари тўғрисида”ги қарори қабул қилинди.

Мазкур Қарорда Фарғона вилояти Риштон шаҳрида “Халқаро кулолчилик фестивали” ҳамда фестиваль доирасида “Анъанавий кулолчиликни сақлаш ва уни ривожлантириш: муаммо ва ечимлар” мавзусидаги илмий-амалий конференция ўтказиш бўйича норматив-ҳуқуқий ҳужжат лойиҳасини манфаатдор вазирлик ва идоралар томонидан икки ой муддатда ишлаб чиқиш вазифаси қўйилди.

Эслатиб ўтамиз, жорий йил 4-5 февраль кунлари Ўзбекистон Республикаси Президенти Фарғона вилоятига ташрифи давомида Риштонда қад ростлаган “Ҳунармандлар шаҳарчаси”да бўлиб у ерда фаолият юритаётган моҳир кулоллар билан суҳбатда бўлган.

Ҳунарманд кулолларга яратилган шарт-шароитлар ва имкониятлар билан танишар экан Давлат Раҳбари кулолчиликни ҳар томонлама қўллаб-қувватлаш, ривожлантириш учун шарт-шароитлар яратиш, кулолчилик маҳсулотларини экспорт қилишга кўмаклашиш каби вазифалар акс этган Президент қарори лойиҳасини ишлаб чиқиш бўйича фикр-мулоҳазалар билдирган эди.

ССП Ахборот-хизмати