“Xalqaro kulolchilik festivali” o‘tkaziladi.

O‘zbekiston Respublikasi Prezidentining 2021 yil 23 mart kuni “Kulolchilikni jadal rivojlantirish va qo‘llab-quvvatlash chora-tadbirlari to‘g‘risida”gi qarori qabul qilindi.

Mazkur Qarorda Farg‘ona viloyati Rishton shahrida “Xalqaro kulolchilik festivali” hamda festival' doirasida “An'anaviy kulolchilikni saqlash va uni rivojlantirish: muammo va yechimlar” mavzusidagi ilmiy-amaliy konferensiya o‘tkazish bo‘yicha normativ-huquqiy hujjat loyihasini manfaatdor vazirlik va idoralar tomonidan ikki oy muddatda ishlab chiqish vazifasi qo‘yildi.

Eslatib o‘tamiz, joriy yil 4-5 fevral' kunlari O‘zbekiston Respublikasi Prezidenti Farg‘ona viloyatiga tashrifi davomida Rishtonda qad rostlagan “Hunarmandlar shaharchasi”da bo‘lib u yerda faoliyat yuritayotgan mohir kulollar bilan suhbatda bo‘lgan.

Hunarmand kulollarga yaratilgan shart-sharoitlar va imkoniyatlar bilan tanishar ekan Davlat Rahbari kulolchilikni har tomonlama qo‘llab-quvvatlash, rivojlantirish uchun shart-sharoitlar yaratish, kulolchilik mahsulotlarini eksport qilishga ko‘maklashish kabi vazifalar aks etgan Prezident qarori loyihasini ishlab chiqish bo‘yicha fikr-mulohazalar bildirgan edi.

SSP Axborot-xizmati