Теримдан кейинги маҳсулот сақлаш технологияларининг долзарб масалалари

Жорий йилнинг 17-19 май кунлари Россия Федерациясининг молиявий кўмагида амалга оширилаётган БМТТД ва Савдо-саноат палатасининг ҳамкорлигидаги «Фарғона водийсида фермерларни иқлим ўзгариши ҳатарларига мослашиши ва барқарорлигини ошириш» лойиҳаси доирасида Наманган, Андижон ва Фарғона вилоятларида мева-сабзавотларни теримдан кейинги сақлаш технологияларига бағишланган семинар ташкил этилди ва унда фермер хўжаликларининг 80 нафардан ортиқроқ вакиллари иштирок этдилар.

Сақлаш жараёнини иштирокчиларга амалиётда намойиш қилиш мақсадида ҳар бир вилоятдаги семинарлар саноат музлатгичлари бор хўжаликлар худудларида ташкил этилди. Шунингдек иштирокчилар музлатгичларнинг тузилиши ва ишлаши, сақланаётган маҳсулотларнинг ҳолати, совуқхона ташкил этиш ва ривожлантириш бўйича лойиҳалари бўйича амалий тавсиялар олишга муваффақ бўлдилар.

«Ҳаво ҳарорати, нисбий намлик, маҳсулотни сифатини узоқ муддат сақлаб қолиш, меваларнинг музлатиш ва совутиш ҳароратлари, этилен турли хил мева ва сабзавотларнинг яроқлилик муддатига қандай таъсир қилиши ҳақида берилган маълумотлар мен учун жуда муҳим бўлди. Совуқхонага маҳсулотни сақлаш учун қўйишим биланоқ, мен ижарачи ва исте’молчилар олдида маҳсулотнинг якуний сифати олдида жавобгарман”, - дейди семинар қатнашчиларидан бири Воҳиджон Бувамирзаев.

Маҳсулотларда касалликлар ва зараркунандаларни тарқалишининг олдини олиш чоралари шу жумладан, картошка, гилос, лимон ва бошқа экинлардаги карантин объектлар ҳақида Ўсимликлар карантини давлат инспексиясининг ҳудудий бўлинмалари вакиллари сўзлаб беришди. Шунингдек, улар сақлаш учун қўйилаётган сарҳил ва қуритилган мева-сабзавотларга ишлов бериш, маҳсулотларни сақлаш ва ташиш талаблари тўғрисида иштирокчиларга батафсил тушунчалар беришди.

Таъкидлаш жоизки, 2019 йилдан буён лойиҳа томонидан фермерларга бағишлаб 15 дан зиёд тематик семинарлар ташкил этилган ва мазкур семинар иқлим ўзгаришига мослашиш чоралари сиклидаги якуний семинардир. Ўтган давр ичида 1700 нафардан зиёд иштирокчилар қишлоқ хўжалиги фаолиятларига доир билим ва кўникмаларини оширдилар.

ССП Матбуот хизмати