Тошкент вилоятида “Тадбиркор мигрант” лойиҳаси амалга оширилмоқда

Сўнгги йилларда аҳолининг кенг қатламини тадбиркорликка жалб қилиш ва уларнинг даромад манбаларини кенгайтиришга қаратилган чора-тадбирлар амалга оширилмоқда. Бунга мисол тариқасида “Тадбиркор мигрант” лойиҳасини келтиришимиз мункин.

 Ўзбекистон Республикаси Президентининг 2020 йил 15 сентябрдаги “Хавфсиз, тартибли ва қонуний меҳнат миграцияси тизимини жорий қилиш чора-тадбирлари тўғрисида”ги ПҚ-4829-сонли Қарори ижросини таъминлаш мақсадида меҳнат мигрантлариниг ташаббусларини қўллаб-қувватлаш бўйича “Тадбиркор мигрант” лойиҳаси асосида қисқа муддатли ўқув курслари ташкил этилган.

“Тадбиркор мигрант” лойиҳаси Ташқи меҳнат миграция агентлиги томонидан Бандлик ва меҳнат муносабатлари вазирлиги, Савдо-саноат палатаси ҳамкорлигида ташкил этилган бўлиб, ундан кўзланган асосий мақсад, хорижда ишлаб, малака орттириб қайтган меҳнат мигрантларини Ўзбекистонда тадбиркорлик фаолиятига жалб қилишни қўллаб-қувватлаш, уларни тадбиркорликка йўналтириш бўйича методик билим ва тавсияларни беришдан иборат.

Худди шу каби тадбир жорий йилнинг 29 май куни Тошкент вилоятида ҳам бўлиб ўтди. “Тадбиркор мигрант” лойиҳаси бўйича ўқув курсларини муваффақиятли тамомлаган 23 нафар фуқароларга тантанали равишда сертификатлар топширилди.

Тошкент вилояти бўйича бу каби ўқув курсларига жами 340 нафар меҳнат мигрантлари, жумладан ишсиз ёшлар ва хотин қизларни жалб этиш кўзда тутилган. Ўқишни битирган тингловчиларга махсус сертификатлар берилади. Келгусида уларни ўз бизнесини очиш ва ривожлантиришга амалий ёрдам бериб борилади.

ССП Матбуот хизмати