Республикамизда туризмни ривожалантиришга қаратилган истиқболли инвестицион лойиҳа муҳокама қилинди

Жорий йилнинг 2 июнь куни Ўзбекистон Савдо-саноат палатасида “Agronur” МЧЖ томонидан ишлаб чиқилган мамлакатимизда туризмни ривожалантиришга қаратилган “TURFA SAYYOH” лойиҳасининг тақдимоти бўлиб ўтди.

Ушбу учрашувда туризм соҳасини ривожлантиришда “TURFA SAYYOH” лойиҳа доирасида кластер усулини қўллаш ва бунда соҳага оид барча йўналишларни бирлаштириш орқали мамлакатимизга ташриф буюрувчи хорижий сайёҳлар сонини кўпайтириш, туризм инфратузилмаси объектларида хизмат кўрсатишни яхшилаш, туризм соҳасидаги мутахассисларнинг малакасини ошириш, бунда давлат ва хусусий сектор шерикчилигига асосланган тамойилни кенг татбиқ этган ҳолда туризм соҳасини ривожлантириш масалалари Ўзбекистон Республикаси Туризм ва спорт вазирлиги, Маданият вазирлиги, Транспорт вазирлиги ҳамда “Uzbekistan Airports” АЖнинг масъул ходимлари иштирокида атрофлича муҳокама қилинди.

Учрашув давомида вазирлик ва идораларнинг масъул ходимлари томонидан лойиҳа тақдимотидан сўнг берилган саволларга “Agronur” МЧЖ мутахассислари томонидан тегишли жавоблар берилди ҳамда мазкур лойиҳанинг ҳар бир йўналиши бўйича аниқ ишларни амалга ошириш учун тегишли вазирлик ва идораларда лойиҳани қўшимча равишда батафсил муҳокама этиш ҳамда мутасадди вазирлик ва идоралар билан ҳамкорликда уни амалга оширишга келишиб олинди.

ССП Матбуот хизмати