Ўзбекистон Савдо-саноат палатаси Тошкент вилояти ҳудудий бошқармаси томонидан тадбиркорлик субъектининг ҳуқуқ ва қонуний манфаатлари ҳимоя қилинди.

Савдо-саноат палатаси Тошкент вилояти бошқармасига палата аъзоси “Хон Қизи” МЧЖ мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

Мурожаат ўрганилиб чиқилганда “ХОН ҚИЗИ” МЧЖ  ва «ТЕХНО-ЗАЩИТА» МЧЖ  ўртасида тузилган олди-сотди шартнома шартлари «ТЕХНО-ЗАЩИТА» МЧЖ томонидан қўпол равишда бузилганлиги аниқланди.

Шундан сўнг Савдо-саноат палатаси Тошкент вилояти бошқармаси томонидан «ТЕХНО-ЗАЩИТА» МЧЖга нисбатан  “ХОН ҚИЗИ” МЧЖ манфаатида судга даъво ариза киритилди.

Натижада “Хон қизи” МЧЖнинг қонуний манфаатлари ҳимоя қилиниб, жамият фойдасига  313 191 300 сўм асосий қарз, 60 000 000 сўм пеня, жами 373 191 300 (уч юз етмиш уч миллион бир юз тўқсон бир минг уч юз) сўм миқдоридаги қарздорликни ундириш тўғрисида суд ҳал қилув қарори чиқарилди.

ССП Ахборот-хизмати