Ўзбекистон Савдо-саноат палатаси томонидан Қозоғистоннинг Актюбинск вилоятига сабзавот маҳсулотларини экспорт қилиш масалалари муҳокама этилди.

Ўзбекистон Савдо-саноат палатаси томонидан Ўзбекистон Республикасининг Қозоғистон Республикаси Актау шаҳридаги Бош консуллиги билан ҳамкорликда Қозоғистоннинг Актюбинск вилояти акимияти, вилоят Тадбиркорлар палатаси ҳамда Актюбинск вилоятининг қатор йирик бозор дирекциялари ҳамда савдо компаниялари иштирокида Ўзбекистондан сабзавот маҳсулотларини Қозоғистоннинг ушбу вилоятига етказиб бериш масалалари муҳокама этилди.

Тадбирда Қозоғистон томонидан Актюбинск вилояти акимияти, бир қатор бозорлар дирекциялари раҳбарлари сўзга чиқиб, ҳозирда Қозоғистонда узлуксиз таъминлаш зарур бўлган ижтимоий муҳим озиқ-овқат маҳсулотлари рўйхати шакллантирилаётгани ҳамда бунда Қозоғистонга қишлоқ хўжалиги маҳсулотларини етказиб беришда Ўзбекистоннинг тадбиркорлик субъектлари билан ўзаро ҳамкорлик қилишга қизиқиш мавжудлигини маълум қилишди.

Ушбу тадбирда Ўзбекистон Савдо-саноат палатаси масъул ходими Ғафуржон Усмонов иштирок этиб, Ўзбекистондан қишлоқ хўжалиги маҳсулотлари, шу жумладан, сабзавот маҳсулотларини етказиб бериш имкониятлари мавжудлиги, бу борада Савдо-саноат палатаси Ўзбекистондан салоҳиятли экспортер, агрофирма ва савдо компанияларини жалб этишда амалий ёрдам бериши, бунинг учун Қозоғистон компанияларидан харид қилинадиган сабзавотлар тури, улар бўйича талаб этиладиган маҳсулотлар ҳажми, харид қилинадиган нархлари тўғрисида маълумот тақдим этилиши, маҳсулотни етказиб бериш муддатлари, уни транспортировка қилиш усуллари ҳамда бошқа шартлари тўғрисида тижорат сўровлари шакллантирилиши лозимлиги алоҳида таъкидлаб ўтилди.

Шунингдек, тадбирда Актюбинск вилоятида фаолият юритувчи йирик озиқ-овқат (қишлоқ хўжалиги) маҳсулотлари савдо  бозорлари дирекциялари раҳбарлари сўзга чиқиб, Ўзбекистондан қишлоқ хўжалиги маҳсулотларини харид қилиш борасидаги таклифларини билдириб ўтишди.

Тадбир якунида Актюбинск вилояти акимияти томонидан Қозоғистон компанияларининг сабзавот маҳсулотлари харид қилиш бўйича тижорат таклифларини шакллантириб, қисқа муддатда Ўзбекистон Савдо-саноат палатасига салоҳиятли экспортерларни жалб этиш учун етказиб берилишига келишиб олинди.

ССП Ахборот-хизмати