БМТнинг Ўзбекистон Республикаси ва Қирғизистон Республикасидаги ваколатхоналари кўмагида Ўзбекистон Республикаси ва Қирғизистон Республикаси ўртасида чеграолди ҳамкорликнинг истиқболли йўналишлари муҳокама этилди

2021 йил 30 июль куни Ўзбекистон Савдо-саноат палатаси масъул ходими Ғ.Усмонов “БМТнинг Тинчликни барпо этиш жамғармаси кўмагида Қирғизистон Республикаси ва Ўзбекистон Республикаси чегараолди ҳудудларида ҳамкорлик дастури истиқболлари” мавзусидаги семинарда иштирок этди.

Мазкур семинар БМТнинг Ўзбекистондаги доимий координатори офиси томонидан Ўзбекистон Республикаси Президенти ҳузуридаги Стратегик ва минтақалараро тадқиқотлар институти билан ҳамкорликда ҳамда БМТнинг Қирғизистондаги доимий координатори офиси кўмагида ташкил этилди.

Тадбирда Ўзбекистон ва Қирғизистоннинг давлат органлари, илмий-тадқиқот институтлари, маҳаллий ҳокимият органлари ҳамда нодавлат нотижорат ташкилотлари вакиллари иштирок этдилар.

Семинар иштирокчилари БМТнинг Тинчликни барпо этиш жамғармаси  томонидан тақдим этилган икки давлат Ташқи ишлар вазирликлари мувофиқлаштирувида ҳамда Ўзбекистон ва Қирғизистоннинг илмий-тадқиқот инстутутларини жалб этган ҳолда тайёрланган Қирғизистон ва Ўзбекистон ўртасида чегараолди ҳамкорлик истиқболларини баҳолашга доир таҳлилий маълумотни муҳокама қилдилар.

Тадбир давомида семинар иштирокчилари Ўзбекистон ва Қирғизистон ўртасида чегараолди ҳамкорликнинг истиқболли йўналишларини белгилаб олиш бўйича таҳлилий маълумотда келтирилган қуйидаги йўналишларда қўшма таклифларни ишлаб чиқдилар:

1. Чегараолди ҳудудлари ҳамда чегарадан ўтиш жараёнининг хавфсизлиги ва барқарорлигини таъминлаш;

2. Иқтисодий ҳамкорликни маҳаллий миқёсда ҳар томонлама фаоллаштириш ва кенгайтириш;

3. Мулоқот орқали ижтимоий жипслашув ва ишончни мустаҳкамлаш;

4. Ҳамкорликни мустаҳкамлаш ва низоларни  бартараф этиш масалаларида маҳаллий ҳокимият органларининг салоҳиятини ошириш;

5. Кичик бизнесни қўллаб-қувватлаш орқали иш ўринларини яратиш;

6. Инфратузилмани яхшилаш.

Семинарда Савдо-саноат палатаси томонидан Ўзбекистон ва Қирғизистон ўртасидаги чегараолди ҳудудларда яхши қўшничилик, дўстлик ва томонлар манфаатларини ҳурмат қилиш тамойиллари асосида ўзаро ҳамкорликни мустаҳкамлашга қаратилган истиқболли таклифлар билдирилди.

Тадбир якуни бўйича БМТнинг Тинчликни барпо этиш жамғармаси кўмагида яқин истиқболга мўлжалланган икки давлат ўртасида чегараолди ҳамкорликни амалга оширишга қаратилган лойиҳа ҳужжати концепциясини ишлаб чиқишга келишиб олинди.

ССП Ахборот-хизмати