Жамоатчилик экспертизаси ўтказилган яна бир норматив-ҳуқуқий ҳужжат лойиҳаси хусусида

“Ўзбекистон Республикаси Савдо-саноат палатаси тўғрисида”ги Қонуннинг 22-моддасида белгиланган Савдо-саноат палатасининг қонун ижодкорлиги соҳасидаги ваколатларини амалга оширган ҳолда, Палата томонидан қонунчилик ҳужжатлари лойиҳалари юзасидан Жамоатчилик экспертизалари ўтказилиб, уларнинг тадбиркорлик фаолиятига таъсирини баҳолаган ҳолда, салбий ҳамда ижобий характердаги Хулосалар бериб келинмоқда.

Хусусан, жорий йилнинг ўтган даври мобайнида 559 та норматив-ҳуқуқий ҳужжат лойиҳаси Палата томонидан кўриб чиқилиб, Жамоатчилик экспертизаси хулосалари берилди.

Мисол учун, Ўзбекистон Республикаси Ветеринария ва чорвачиликни ривожлантириш давлат қўмитаси томонидан ишлаб чиқилган Ўзбекистон Республикаси Вазирлар Маҳкамасининг “Ихтисослаштирилган сўйиш корхоналари фаолиятини тартибга солиш ҳамда истеъмол бозорига гўшт ва гўшт маҳсулотларини етказиб бериш тизимини янада такомиллаштириш чора-тадбирлари тўғрисида” 2019 йил 8 майдаги 386-сон қарорига ўзгартириш ва қўшимчалар киритиш ҳақида”ги Қарори (ID-47996) лойиҳаси  жамоатчилик экспертизасидан  ўтказилиб, у юзасидан қуйидагича Жамоатчилик экспертизаси хулосаси берилди:

1. Лойиҳа иловасида Вазирлар Маҳкамасининг “Ихтисослаштирилган сўйиш корхоналари фаолиятини тартибга солиш ҳамда истеъмол бозорига гўшт ва гўшт маҳсулотларини етказиб бериш тизимини янада такомиллаштириш чора-тадбирлари тўғрисида” 2019 йил 8 майдаги 386-сон қарори 1-иловасини 79¹ – 79⁵-бандлари билан тўлдириш таклиф қилинмоқда.

Бунда, таклиф этилаётган таҳрир билан паррандачилик соҳасидаги корхоналарнинг фаолият юритиш тартибини белгилаб қўйиш назарда тутилмоқда.

Вахолангки, ушбу қўшимчаларни ишлаб чиқишга асос бўлган Ўзбекистон Республикаси Президентининг 2021 йил 14 июндаги ПҚ-5146-сон қарори 3-иловаси 7-бандида “Вазирлар Маҳкамасига парранда сўйиш корхоналарига қўйиладиган минимал талабларни назарда тутувчи қоидаларни ишлаб чиқиш ва тасдиқлаш учун норматив-ҳуқуқий ҳужжат лойиҳасини киритиш” белгиланган.

Яъни, парранда сўйиш корхоналарига қўйиладиган минимал талабларни белгилаш вазифаси назарда тутилган бўлиб, бунда Ўзбекистон Республикаси Президентининг 2021 йил 14 июндаги ПҚ-5146-сон қарорида белгиланган топшириқдан четга чиқиш ҳолати кузатилмоқда.

Бундан ташқари, таклиф этилаётган қўшимчалар тадбиркорлик фаолиятини ортиқча тартибга солиш орқали, бизнесга маъмурий босимнинг ортишига сабаб бўлади.

Шу боис, лойиҳада фақат парранда сўйиш корхоналарига қўйиладиган минимал талабларни белгилаш лозим.

2. Лойиҳа иловасида Вазирлар Маҳкамасининг “Ихтисослаштирилган сўйиш корхоналари фаолиятини тартибга солиш ҳамда истеъмол бозорига гўшт ва гўшт маҳсулотларини етказиб бериш тизимини янада такомиллаштириш чора-тадбирлари тўғрисида” 2019 йил 8 майдаги 386-сон қарори 1-иловаси 99-бандини қуйидаги таҳрирдаги учинчи хатбоши билан тўлдириш таклиф этилмоқда:

“Ихтисослашган сўйиш корхонасидан реализацияга (чекловларсиз сотиш, истеъмол қилиш, қайта ишлаш ва бошқалар) чиқарилаётган ҳайвон танаси (ҳар бир бўлаги) бўлакларига белгиланган тартибда ахборот тизими орқали шакллантириладиган QR код ёрлиғи ёпиштирилади ҳамда гўшт ветеринария-санитария экспертизасидан ўтказилганлиги тўғрисидаги тегишли тамға (QR кодли ёрлиғи) босилади”.

Бироқ, бу шаклдаги мураккаб талабларнинг белгиланиши амалиётда ушбу тартибнинг ишламаслигига сабаб бўлиши ҳамда лойиҳа билан таклиф қилинаётган ўзгартириш ва қўшимчалар самарасини йўққа чиқариши мумкин.

Шу боис, лойиҳани сўйилган гўшт маҳсулотларига қўйиладиган талабларни соддалаштириш нуқтаи назаридан қайта кўриб чиқиш лозим.

ССП Матбуот хизмати