Ўзбекистон Савдо-саноат палатаси томонидан яна бир тадбиркорнинг ҳуқуқ ва қонуний манфаатлари ҳимоя қилинди

Ўзбекистон Республикаси Савдо-саноат палатасига Палата аъзоси “ZENATKOR TEMIR BETON BUYUMLARI” МЧЖ мурожаат қилиб, ҳуқуқ ва қонуний манфаатларини ҳимоя қилишда амалий ёрдам сўраган.

Жиззах вилоят давлат солиқ бошқармаси томонидан “ZENATKOR TEMIR BETON BUYUMLARI” МЧЖ фаолиятида солиқ аудити ўтказилган ва якуни бўйича 2021 йил 5-майдаги 377-сонли қарор расмийлаштирилган.

Ўз фаолияти тўхтаб қолмаслиги ва солиқ аудити бўйича аниқланган камчиликлар бартараф этиш мақсадида “ZENATKOR TEMIR BETON BUYUMLARI” МЧЖ томонидан вилоят солиқ бошқармасига солиқ аудити якуни бўйича қабул қилинган қарор ижросини тўхтатиб туриш тўғрисида мурожаат қилган. Бироқ, солиқ бошқармаси томонидан асоссиз равишда рад жавоби берилган.

Савдо-саноат палатаси томонидан Палата аъзосининг мурожаати атрофлича ўрганиб чиқилиб, вилоят солиқ бошқармасига нисбатан солиқ аудити якуни бўйича қабул қилинган 2021 йил 5 майдаги 377-сонли қарор ижросини тўхтатиб турмасликда ифодаланган харакатсизлигини қонунга хилоф деб топиш хақида судга аризаси билан мурожаат қилинган.

Жиззах туманлараро маъмурий судининг қарори билан Палатанинг аризаси қаноатлантирилиб, вилоят солиқ бошқармаси масъулларининг қарор ижросини тўхтатиб турмасликда ифодаланган харакатсизлигини қонунга хилоф деб топилган ва, шу тариқа, Палата аъзосининг ҳуқуқ ва қонуний манфаатлари ҳимоя қилинган.

ССП Матбуот хизмати